მსოფლიო კინოს მარადიული პრინცესა და "მიწიერი ანგელოზი" ოდრი ჰეპბერნი სრულიად სამართლიანად ითვლება მსოფლიო კინოს ერთ-ერთ ყველაზე ლამაზ მსახიობად. XX საუკუნის ულამაზეს ქალად აღიარებული, ლეგენდარული ოდრი ჰეპბერნი გახლდათ უაღრესად ნიჭიერი, არტისტული და ძალზედ მგრძნობიარე. მას საოცრად დიდი და კეთილი გული ჰქონდა, რომელიც მასში მთელი სამყაროს სიყვარულს ატევდა. მთელი თავისი არც თუ ხანგრძლივი ცხოვრების მანძილზე ოდრი ბევრ გაჭირვებულ და ხელმოკლე ადამიანს ეხმარებოდა. სწორედ ამ მიზეზის გამო იქცა ის მილიონობით ადამიანისთვის შთაგონების წყაროდ და მისაბაძ მაგალითად.

თუმცა ცხოვრებაში ოდრიმ ბევრი სიმწარე და გაჭირვება ნახა. პატარა გოგონამ მეორე მსოფლიო ომის უმძიმესი წლები დედასთან ერთად გამოიარა. ქალებს მისი დახვეწილი და მინიატურული ფიგურის ყოველთვის შურდათ, მისი წონა ხომ სულ რაღაც - 45 კგ-ის ნიშნულსაც კი ვერ სცდებოდა, თუმცა ცოტამ თუ იცის რომ მსახიობს ნივთიერებათა ცვლის დარღვევა ჰქონდა, რაც მრავალწლიანი შიმშილით იყო განპირობებული. გოგონა ბალერინობაზე ოცნებობდა. ამისთვის ის დიდხანს და ჯიუტად ვარჯიშობდა და ემზადებოდა.

თუმცა თავდაუზოგავი შრომისა და მონდომების მიუხედავად, ყველა ერთხმად აღიარებდა, რომ გოგონა ბალეტისთვის შეუფერებელი იყო, მიზეზად კი მის სიმაღლეს ასახელებდნენ, ოდრი 170 სმ-ის გახლდათ.

მოგვიანებით მან თავი სამოდელო სფეროშიც სცადა, სწორედ აქედან მოხვდა ის უკვე დიდ კინოშიც, თუმცა საბალეტო წარსულიდან მას ერთი თავისებურება შემორჩა, რომლისაც მას ძალიან რცხვენოდა. მსახიობს დიდი, მსხვილი ტერფები და ფეხის შთამბეჭდავი 41-ე ზომა ჰქონდა.

ეს გახლდათ ოდრის ყველაზე დიდი კომპლექსი. მოგვიანებით ჰეპბერნმა ცნობილ იტალიელ მეწაღეს სალვატორე ფერაგამოს მიმართა, რომელმაც პერსონალურად მისთვის ფეხსაცმლის ისეთი დიზაინი შექმნა, რომელიც მის ტერფებს ვიზუალურად ამცირებდა - ასე შეიქმნა ყველასთვის ცნობილი და საყვარელი ე.წ. "ბალეტკები".