სოციალური ქსელები თითქმის ყველა თანამედროვე ადამიანის ცხოვრების განუყოფელი ნაწილი გახდა. მათ ვიყენებთ მეგობრებთან და ოჯახებთან კომუნიკაციისთვის, ახალი ამბების და ინფორმაციის მისაღებად, გასართობად. ბევრი ადამიანი გაღვიძებისთანავე ამოწმებს სოციალურ ქსელებს, რომ გაიგოს, რა მოხდა ახალი მსოფლიოში, სანამ ეძინათ.

რა ემართება ტვინს, როცა ამას ვაკეთებთ? რა შედეგები შეიძლება მოჰყვეს ამ ქცევას ჩვენი ფსიქიკური და ფიზიკური ჯანმრთელობისთვის?

დოფამინის დონის შემცირება

დოფამინი ნეიროტრანსმიტერია, რომელიც მნიშვნელოვან როლს ასრულებს მოტივაციაში, დაჯილდოებასა და სწავლებაში. როცა ვიღებთ რაღაცას, რაც მოგვწონს, მაგალითად, სოციალურ ქსელებში მოწონებას, ორგანიზმში დოფამინი გამოიყოფა. ეს იწვევს სიამოვნების და კმაყოფილების განცდას.

სოციალური ქსელების მუდმივი გამოყენება დოფამინის დონის შემცირების მიზეზი შეიძლება გახდეს. ეს ხდება, რადგან ტვინი დადებითი სტიმულების მუდმივ მიწოდებას ეჩვევა. შედეგად, გვჭირდება მეტი სოციალური მედია, რომ იმავე დონის სიამოვნება მივიღოთ.

ნეგატიური შედეგები

დოფამინის დონის შემცირებას შეიძლება ჰქონდეს შემდეგი შედეგები:

1. სოციალურ მედიაზე დამოკიდებულების განვითარების რისკი იზრდება. როცა რაღაცაზე ვართ დამოკიდებულები, ქცევას ვერ ვაკონტროლებთ. მუდმივად ვფიქრობთ, როგორ მივიღოთ წვდომა ამ რაღაცაზე და შფოთვას ან ნერვიულობას განვიცდით, როცა ამას ვერ ვაკეთებთ.

2. მოტივაცია და შრომისუნარიანობა მცირდება. დოფამინის დაბალი დონის დროს მიზნების მიღწევა და ამოცანების შესრულება ნაკლებად გვაინტერესებს. გვიჭირს კონცენტრირება და ძალისხმევის გაღება.

3. დეპრესიის და სხვა ფსიქიკური აშლილობის განვითარების რისკი იზრდება. დეპრესია უკავშირდება დოფამინის დაბალ დონეს. სხვადასხვა სოციალური ქსელის ქრონიკულმა გამოყენებამ შეიძლება გაზარდოს დეპრესიის განვითარების რისკი, განსაკუთრებით იმ ადამიანებში, რომლებიც მის მიმართ მიდრეკილნი არიან.

მაღალ ბეტა ტალღებზე გადასვლა

როდესაც დილით ვიღვიძებთ, ტვინი ბუნებრივად გადის სხვადასხვა ეტაპს, მათ შორის თეტა ტალღებს, რომლებიც დაკავშირებულია მოდუნებასთან და მედიტაციასთან, და ალფა ტალღებს, რომლებიც დაკავშირებულია კრეატიულობასთან და წარმოსახვასთან.

გაღვიძებისთანავე სოციალური ქსელების გამოყენებამ ეს ბუნებრივი პროცესი შეიძლება დაარღვიოს და ტვინს აიძულოს პირდაპირ ბეტა ტალღებზე გადასვლა. ბეტა ტალღები დაკავშირებულია სიფხიზლესთან და ყურადღებასთან.

გაღვიძებისთანავე ბეტა ტალღებზე გადასვლას შეიძლება ახლდეს შემდეგი შედეგები:

1. სტრესის და შფოთვის გაზრდა. ბეტა ტალღები სტრესის და შფოთვის გაზრდილ დონესთან ასოცირდება. როცა ტვინი პირდაპირ ბეტა ტალღებზე გადადის, განვიცდით შფოთვას, დაძაბულობას და დაღლილობას.

2. სწავლის და დამახსოვრების უნარის შემცირება. ბეტა ტალღები ზედაპირულ აზროვნებასთან ასოცირდება. როცა ტვინი პირდაპირ ბეტა ტალღებზე გადადის, ინფორმაციის დამახსოვრება და ახლის სწავლა გვიჭირს.

როგორ შევამციროთ სოციალური ქსელების ნეგატიური გავლენა ტვინზე

თუ თქვენს ტვინზე სოციალური ქსელების ნეგატიური გავლენის შემცირება გსურთ, რამდენიმე რჩევას გიზიარებთ.

1. არ შეამოწმოთ სოციალური ქსელები გაღვიძებისთანავე. მიეცით ტვინს დასვენების დრო, რომ ბეტა ტალღებზე ბუნებრივად გადავიდეს.

2. სოციალურ ქსელებში ყოფნის დრო შეზღუდეთ. განსაზღვრეთ დროის ლიმიტი, მაგალითად, დღეში 30 წუთი.

3. დღის დაწყების ალტერნატიული მეთოდი იპოვეთ. სოციალური ქსელების შემოწმების ნაცვლად რაღაც სხვა რამ გააკეთეთ. მაგალითად, წაიკითხეთ, ივარჯიშეთ, მედიტაცია შეასრულეთ.

თუ სოციალურ ქსელებზე დამოკიდებულებას ებრძვით, დახმარებისთვის სპეციალისტს მიმართეთ.

სოციალური ქსელების გამოყენებას შეიძლება ჰქონდეს როგორც დადებითი, ასევე უარყოფითი გავლენა ჩვენს ტვინზე. მნიშვნელოვანია, სოციალური მედია ზომიერად გამოიყენოთ და იპოვოთ ბალანსი სოციალური ქსელების გამოყენებასა და სხვა საქმიანობას შორის, რომლებიც შეიძლება იყოს სასარგებლო ჩვენი ფსიქიკური და ფიზიკური ჯანმრთელობისთვის.

თქვენთვის ასევე საინტერესო შეიძლება იყოს 15 ჯანმრთელობასთან დაკავშირებული პრობლემა, რომელთაც თანამედროვე ტექნოლოგიები იწვევს