საქართველოდან რუსეთში კონიაკის დისტილატის იმპორტი შესაძლოა გამარტივდეს ქვეყანაში სასმელის წარმოებისთვის ნედლეულის დეფიციტის თავიდან აცილების მიზნით. როგორც გამოცემა "Известия" წერს, ამის შესახებ ალკოჰოლისა და თამბაქოს ბაზრების კონტროლის ფედერალურმა სამსახურმა (Росалкогольтабакконтроль) რუსეთის ფინანსთა სამინისტროს აცნობა.

Росалкогольтабакконтроль -ის მიერ ფინანსთა სამინისტროსადმი გაგზავნილ პასუხში ნათქვამია, რომ სამსახურს სურს უზრუნველყოს კონიაკის რუსი მწარმოებლების უწყვეტი მუშაობა, რომლებსაც გეოპოლიტიკური სიტუაციიდან გამომდინარე იმპორტირებული ნედლეულის მიღება უჭირთ. ფინანსთა სამინისტროში განაცხადეს, რომ საქართველოდან დისტილატის იმპორტის გამარტივების საკითხს ახლა მთავრობაში განიხილავენ.

ამჟამად რუსეთში კონიაკის დისტილატის დეფიციტია და ამიტომ კონიაკის წარმოებისთვის ნედლეულის ძირითადი მოცულობა - 70%-ზე მეტი იმპორტირებულია.

ადრე „სოიუზკონიაკმა“ მოითხოვა საქართველოდან კონიაკის დისტილატის იმპორტის გამარტივება, რათა აღმოიფხვრას ნედლეულის დეფიციტი.

„კონიაკის დისტილატის მიწოდება, შუამავალი ლოგისტიკური და ფინანსური ხარჯების გვერდის ავლით და სატრანზიტო ქვეყნების გავლით (როგორიცაა სომხეთი), უშუალოდ მწარმოებლისგან, საქართველოსგან, ეკონომიკურად უფრო მომგებიანია“, - ნათქვამია ფედერალური სამსახურის წერილში.

ექსპერტები ასევე მიუთითებენ „რუსეთსა და სომხეთს შორის ურთიერთობების ბოლოდროინდელ გართულებაზე“, რაც შეიძლება იყოს საქართველოდან პროდუქციის მიწოდებაზე კონტროლის შესუსტების მიზეზი.