4 თვის წინ გაუჩინარებული რუსთაველი ბიჭი, 25 წლის გიორგი მირზაშვილი კახეთში იპოვეს მოკლული.

ახალგაზრდა ბიჭი გურჯაანის მუნიციპალიტეტში მოკლეს, შემდეგ კი ჭაში ჩააბეტონეს.

ბიჭს სავარაუდო დამნაშავეებთან წარსულში უთანხმოება ჰქონდა, ის კახეთში მოტყუებით ჩაიყვანეს, შემდეგ კი თავის არეში ქვის ჩარტყმით მოკლეს.

ბრალდებულმა 4 თვის შემდეგ დანაშაული თავად აღიარა.

ფაქტთან დაკავშირებით შინაგან საქმეთა სამინისტრომ 2 ადამიანი დააკავა.

"შინაგან საქმეთა სამინისტროს ქვემო ქართლის პოლიციისა და კახეთის პოლიციის დეპარტამენტების თანამშრომლებმა, ერთობლივად ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1999 წელს დაბადებული გ.ს. და 1996 წელს დაბადებული, წარსულში მრავალჯერ ნასამართლევი უ.ბ. ჯგუფურად ჩადენილი განზრახ მკვლელობის ბრალდებით დააკავეს.

დანაშაული 16-დან 20 წლამდე ან უვადო თავისუფლების აღკვეთას ითვალისწინებს.

გამოძიებით დადგინდა, რომ ბრალდებულებმა მიმდინარე წლის ინვარში, ნაცნობი 1997 წელს დაბადებული გ.მ. ქალაქ რუსთავიდან გურჯაანის მუნიციპალიტეტის ერთ-ერთ სოფელში, გ.ს.-ს სახლში წაიყვანეს. ბრალდებულებმა ურთიერთშელაპარაკების ნიადაგზე წარმოქმნილი კონფლიქტისას გ.მ. მოკლეს, რის შემდეგაც კვალის დაფარვის მიზნით ცხედარი სოფლის მოშორებით, ჭაში ჩააგდეს, ჭა ქვებითა და ბეტონით ამოავსეს.

სამართალდამცველებისთვის გ.მ.- ს გაუჩინარების შესახებ ცნობილი მიმდინარე წლის 22 მაისს გახდა. ჩატარებული საგამოძიებო მოქმედებების შედეგად, პოლიციამ გ.ს. და უ.ბ. ბრალდებულის სახით დააკავა.

გამოძიება საქართველოს სისხლის სამართლის კოდექსის 109-ე მუხლის "ი" ქვეპუნქტით მიმდინარეობს, რაც ჯგუფურად ჩადენილ განზრახ მკვლელობას გულისხმობს" - ნათქვამია შსს-ს განცხადებაში.

"ვინ გაგიმეტა გიო ასე სასტიკად, ნათელი და სანთელი შენს ლამაზ სულს"

"ნათელში იყოს შენი ლამაზი სული...მუდამ ჩემს გულში იქნები გიუნა"

"შემზარავი ამბავია, ასე ადამიანის გამეტება არ ვიცი"

"ღმერთო რა უსამართლობაა"

"მშვიდად განისვენე იმიერ საქართველოში გიო დასანანი და დაუჯერებელია ეს ყველაფერი, უფალს ებარებოდე"

"რა სამწუხაროა არ გაიხაროს ვინც ეს ჩაიდინა"-წერენ კომენტარებში გარდაცვლილის ახლობელ-ნაცნობები.