საქართველოს პრეზიდენტის მიხეილ სააკაშვილის განცხადებით, მისი იუსტიციის მინისტრობის დროს ციხეს ქურდები მართავდნენ და ციხის ადმიანისტრაცია ხელფასს სწორედ კრიმინალებისგან იღებდა. ამის შესახებ მან ბათუმში მოსახლეობასთან შეხევდრისას განაცხადა.
„მე ვიყავი იუსტიციის მინისტრი და ჩემს დროს ციხეს მართავდნენ მთლიანად ქურდები. ვაღიარებ ამას. მაშინ ციხის ადმინსიტრაცია არავინ იყო, ისინი ქურდებისგან იღებდნენ ხელფასს. ქურდი ცემდა, ქურდი აუპატიურებდა და ყველაფერს უკეთებდა პატიმრებს“, - აცხადებს სააკაშვილი.
მისი თქმით, საუბარი იმის შესახებ, რომ 8 წლის განმავლობაში პენიტენციურ სისტემაში არაფერი გამოსწორებულა ტყუილია. სააკაშვილი ამბობს, რომ მისმა ხელისუფლებამ გვერდით გასწია ქურდები, პატიმრებს მისცა ნორმალურად კვების საშუალება და დღეს აღარ არის საჭირო, რომ მსჯავრდებულებს საჭმელი გარედან მიაწოდონ. პრეზიდენტის განცხადებით, მათ ასევე შემოიღეს გრძელვადიანი პაემნები, დაიწყეს პრობაციის გაფართოება და მთლიანად აღმოფხვრეს ნარკომანია ციხეებიდან.
„ერთადერთი რამ, რაც ვერ მოვახერხეთ ის იყო, რომ ამ სისტემაში არ იყო პრესტიჟული სამუშაო, ამიტომ აქ შემოძვრნენ ყოფილი გაიშნიკები, რომლებიც იყვნენ ორგანიზებულ დანაშაულთან შეკრულები. ამიტომ მოხდა ის, რაც მოხდა“, - განაცხადა სააკაშვილმა.
მისივე განცხადებით, ამ სისტემაში ბევრი რამ გაკეთდა, უბრალოდ მათ საქმე ბოლომდე ვერ მიიყვანეს.

წყარო: http://news.ge