საქართველო "ეს ტრუხა და უღირსი ბრიყვი ზუსტად ასე ებრძოდა ბოკერიას" - ვისზე საუბრობს თამარ ჩერგოლეიშვილი 2022, 29 ივლისი, 10:02 
"ამომრჩეველთა განათლების საზოგადოების" (VES) დამფუძნებელი, თამარ ჩერგოლეიშვილი "ერთიანი ნაციონალური მოძრაობის" თავმჯდომარის, ნიკა მელიას პარტიის მხარდამჭერების ერთი ჯგუფის მისამართით გაკეთებულ მიმართვას სოციალურ ქსელში ეხმაურება და წერს:
"ეს ტრუხა და უღირსი ბრიყვი ზუსტად ასე ებრძოდა ბოკერიას - მიშას მოღალატეს არ დაუჯეროთ თორემ ჩერგო დაგაჯდებათ თავზეო, კამპანია ჰქონდა გაჩაღებული.
ახლა, როცა მიშისტები იმას შვებიან, რასაც თავად აკეთებდა სამარცხვინოდ - ახლა გაიძახის მიშას ებრძვითო!
გამოვიდეს და ბოდიში მოიხადოს - რომ ყველაზე უღირსი მეთოდით, ქალის მეორეხარისხოვანი როლის გამოყენებით და უმძიმესი ინსტიქტების წახალისებით ცდილობდა დაწინაურებას და აცოცებას." - ვკითხულობთ "ტაბულას" დამფუძნებლის ფეისბუქპოსტში.
ახლა კი, გთავაზობთ ნიკა მელიას იმ მიმართვას, რომელსაც ჩერგოლეიშვილის ზემოაღნიშული პოსტიც მოჰყვა:
"ერთიანი ნაციონალური მოძრაობის მხარდამჭერების ერთ ჯგუფს
——————————————————-
ფეისბუკზე ორკესტრირებულად ისმის კითხვები - სად არის პარტია, რას აკეთებთ, რას აპირებთ, მოიფიქრეთ მიხეილ სააკაშვილის დახსნის მექანიზმი.
განზრახ მავნებლებთან საუბარს არც ვაპირებ, მინდა მივმართო ჩვენი პარტიის ამომრჩევლების იმ ჯგუფს, რომლებიც დიდ პატივისცემას იმსახურებენ და გულწრფელად არიან შეწუხებულები მიხეილ სააკაშვილის მდგომარეობით და და უნებლიეთ ხდებიან ამ პროცესის მონაწილეები.
ნუ გავხდებით ამ პროპაგანდის მსხვერპლი, თუ მართლაც გვადარდებს მიხეილ სააკაშვილის ბედი, ნუ მივიღებთ უნიჭოდ დადგმულ სპექტაკლში მონაწილეობას.
დავფიქრდეთ და ადვილად მივხდებით, რატომაც თამაშობენ თქვენს გულწრფელ ემოციებზე. მათი მიზანი ერთადერთია - გაგვთიშონ და იბატონონ.
მერწმუნეთ, ასე მხოლოდ გავუხანგრძლივებთ პატიმრობას მიხეილ სააკაშვილს.
მიშას სამკურნალოდ გადასაყვანად ბევრი კეთდება, ოღონდ მისი გათავისუფლების მხოლოდ ერთადერთი მექანიზმი არსებობს - ოლიგარქის ტყვეობიდან უნდა გავათავისუფლოთ ქვეყანა და ქვეყანასთან ერთად გათავისუფლდება ყველა პოლიტპატიმარი.
სხვა მექანიზმი უბრალოდ არ არსებობს!
ავტოკრატიულ სახელმწიფოში სხვა მექანიზმის მოფიქრება რომ შესაძლებელი ყოფილიყო, როგორ ფიქრობთ, თავად მიხეილ სააკაშვილი არ მოიფიქრებდა თავის დროზე თანამებრძოლების ტყვეობიდან დასახსნელად, რომლებიც წლების განმავლობაში იყვნენ პატიმრობაში?
ახლა, როცა ცივილიზებულმა სამყარომ კედელთან მიიმწყვდია ოლიგარქი და როგორც არასდროს, ისე ახლო და გარდაუვალია ავტოკრატიის დამარცხება.
ყველა ერთად გავუფრთხილდეთ ერთობას, რადგან ძალა, რომელმაც უნდა დაამარცხოს ოლიგარქი, ჩვენს კონსოლიდაციაშია. სწორედ ამიტომ ცდილობენ ეჭვისა და შუღლის თესვას ასე გააფთრებით.
არ დავმალავ, არის მცირე ჯგუფი, რომელიც ჩვენს მხარდამჭერად აცხადებს თავს, რეალურად კი ცდილობენ საყრდენის გამოცლას. მათ აქვთ მიუღებლობა ყოველგვარი სიახლის, ახალი ამომრჩევლის, ახალგაზრდების, რომლებიც ამ ბოლო დროს გვიერთდებიან ბრძოლაში. გაშმაგებული ებრძვიან მათ, ყველანაირად ცდილობენ გული აუცრუონ პოლიტიკურ პროცესებში ჩართულობაზე. მათი მიზანი მარტივი და ვირეშმაკულია - არაფრის დიდებით არ დაუშვან არც ჩვენი რიგების ზრდა და არც ამომრჩევლის რიცხოვნობის ზრდა, რადგან მათ ზუსტად იციან რომ ამ შემთხვევაში ჩვენი გამარჯვება გარდაუვალია.
პირდაპირ გეტყვით, როდესაც მე მებრძვით, მიხეილ სააკაშვილს ებრძვით, რადგან ჩემი, ენმ-ის გამარჯვებით, მარცხდება ოლიგარქი და ტყვეობიდან თავისუფლდება მიხეილ სააკაშვილი!
ჩემთან ბრძოლით და ჩემი თუნდაც დამარცხებით კი, ვერც ქვეყანას დაიხსნით ტყვეობიდან და ვერც მიხეილ სააკაშვილს.
დამიჯერეთ, თუმცა ეს არცაა დაჯერება - არდაჯერების სფერო, ამას გონიერი ადამიანი ისედაც მიხვდება - არავის, არც ერთ თქვენგანს, ბევრი მიზეზის გამო, არ უნდა მიხეილ სააკაშვილის პატიმრობიდან დახსნა ისე, როგორც მე.
სააკაშვილს სწორედ მრავალმხრივი, დაუღალავი და რუტინული შრომა დაიხსნის პატიმრობიდან და არა, ემოციური შეძახილები, რომელსაც მხოლოდ ემოციებისგან და ბრაზისგან დაცლის ფუნქცია აქვს და სხვა არაფერი მოაქვს.
პარტიას ერთდროულად რამდენიმე ურთულესი ამოცანა აქვს გადასაწყვეტი: პოლიტმატიმრების გათავისუფლება, პარტიის გაძლიერება, მხარდამჭერთა რიგების გაფართოება ახალი ამომრჩევლის შემოკრების გზით.
ყოველდღიურად ვხვდებით ჩვენს თანამებრძოლებს, ჩვენს აქტიურ მხარდამჭერებს, აგვისტოდან კი უკვე ფართო წრეებთან დავიწყებთ შეხვედრებს, რომ კიდევ უფრო მეტნი გავხდეთ, კიდევ უფრო დავიმუხტოთ, გადავდოთ ერთმანეთს არა უიმედობა, არამედ გამარჯვების რწმენა, რომ მზად ვიყოთ ყველა ტიპის გამოწვევებისთვის, რომ მალე დადგეს გარდამტეხი მომენტი და ღირსეულად ვიდგეთ იმ ბრძოლის ავანგარდში, რომელიც უფსკრულიდან ამოიყვანს და გაამარჯვებინებს ჩვენს ქვეყანას.
დავდგეთ ერთად, ვიზრუნოთ იმაზე რომ უფრო მეტნი ჩავერთოთ ამ ისტორიულ პროცესში, ერთად ვიბრძოლოთ ოლიგარქის ტყვეობიდან ქვეყნისა და პოლიტპატიმრების დასახსნელად და ქვეყნის ევროპაში დასამკვიდრებლად!
უნდა გავიმარჯვოთ,
ჩვენ დამარცხების უფლება წაგვართვა ისტორიამ და ნუ დავიბრუნებთ მას!"- წერს ნიკა მელია მიმართვაში.
|
