გაეროს გენერალური მდივანი ანტონიო გუტერეში შეშფოთებას გამოთქვამს ავღანელი ხალხის მიმართ, რომლებიც მნიშვნელოვან ეკომიკურ კრიზისს განიცდიან. გუტერეშმა მოუწოდა თალიბებს, რომ უზრუნველყონ შესაბამისი უსაფრთხოება ავღანელებისთვის და დაიცვან ადამიანის უფლებები. ”ამ მომენტში, ჩვენ გვჭირდება, რომ გლობალურმა საზოგადოებამ და საბჭომ უზრუნველყოს შესაბამისი რესურსები ავღანელი ხალხისათვის“. - თქვა მან.

გენერალურმა მდივანმა აღნიშნა, რომ ავღანეთი დიდი ხანია უსამართლოდ არის გამოყენებული, როგორც სასტიკი კონფლიქტებისა და ტერორიზმის პლატფორმა. „ავღანელებს სჭირდებათ მშვიდობა, იმედი და დახმარება. როგორც მორალური პასუხისმგებლობის საკითხი, რეგიონული და გლობალური უსაფრთხოება- ჩვენ არ შეგვიძლია მივატოვოთ ავღანელი ხალხი“-განაცხადა მან.

ავღანეთში მოქალაქეების ნახევარზე მეტი განიცდის შიმშილის უკიდურეს დონეს. ავღანეთში ზოგიერთი ოჯახი იძულებული გახდა, რომ გაეყიდა ჩვილი, იმისათვის, რომ საკვების ყიდვა შესძლებოდა. გაეროს მსოფლიო სურსათის პროგრამა ამბობს, რომ ავღანეთში ყოველი ცხრა ოჯახიდან რვა შიმშილობს. ამავდროულად, გლობალური საბანკო სისტემის მიერ დაწესებულმა სანქციებმა გაყინა ცენტრალური ბანკის თითქმის 9 მილიარდი დოლარის აქტივები, შესაბამისად ავღანეთს სასიცოცხლო რესურსებისთვის საჭირო სახსრები არ გააჩნია. გუტერეშმა შეახსენა საბჭოს, რომ ამ თვის დასაწყისში გაერომ ავღანეთისთვის 4, 4 მილიარდ დოლარზე მეტი გამოყო, რათა არ დაეშვა სურსათის, განათლებისა და ეკონომიკური სისტემების ჩამოშლა. მან მოუწოდა ქვეყნებს, რომ შეაჩერონ ის წესები და სანქციები, რომლებიც ზღუდავს როგორც ავღანეთის ეკონომიკას, ასევე სასიცოცხლოდ მნიშვნელოვან ჰუმანიტარულ ოპერაციებს.

მსოფლიო სასურსათო პროგრამა (World Food Programme) ანაწილებს საკვებს სოციალურად დაუცველ ოჯახებში, ზამთრის პერიოდში, ქაბულში, ავღანეთი.

გაეროს გენერალურმა მდივანმა ხაზი გაუსვა უსაფრთხოების ხელშეწყობისა და ტერორიზმთან ბრძოლის კრიტიკულ აუცილებლობას.”თუ ჩვენ არ ვიმოქმედებთ და არ დავეხმარებით ავღანელებს, რეგიონი და მსოფლიო გადაიხდის ამისათვის საფასურს” - თქვა მან. „ჩვენ უნდა აღვკვეთოთ ქვეყანაში ყველა ტერორისტული ორგანიზაციის გაძლიერება და გაფართოება. მივმართავ საერთაშორისო თანამეგობრობას, გააძლიეროს მხარდაჭერა ავღანელი ხალხისთვის. მე მივმართავ თალიბანს, რომ აღიაროს და დაიცვას ადამიანის ფუნდამენტური უფლებები“.

გაერომ ქვეყანაში წამოიწყო პროექტი, TEF, 3, 6 მილიარდი დოლარის გეგმა სიცოცხლის გადასარჩენად, ჯანმრთელობის, განათლებისა და სხვა აუცილებელი სერვისების შესანარჩუნებლად. მოცემული პროექტის სპეციალურმა წარმომადგენელმა დებორა ლიონსმა, გაეროს დამხმარე მისიის ხელმძღვანელმა ავღანეთში, განაცხადა, რომ ეს ინვესტიცია მიზნად ისახავს შეაჩეროს ქვეყანაში სიღარიბის მუდმივი ზრდა.ლაიონმა აღნიშნა, რომ იზრდება პოლიტიკური ოპონენტების, სამოქალაქო საზოგადოების წარმომადგენლების და სხვათა დაკავებები, რომლებიც გამოხატავენ უკმაყოფილებას თალიბანის მიმართ. „არც ერთმა ავღანელმა არ უნდა იცხოვროს ღამით კარზე კაკუნის შიშით“-განაცხადა ლაიონმა. „ჩვენ უკიდურესად შეშფოთებულები ვართ იმ შემთხვევების გამო, როდესაც რამდენიმე ქალი აქტივისტი გაიტაცეს საკუთარი სახლებიდან და გაუჩინარდნენ”, - განაცხადა ლაიონმა.

ავღანეთის ეკონომიკური კრიზისის გამო გაეროს ბავშვთა სააგენტო აცხადებს, რომ ავღანელ მასწავლებლებს ყოველთვიურ სტიპენდიას გადაუხდის მინიმუმ ორი თვის განმავლობაში, რადგან ხელფასები თვეების განმავლობაში არ იყო გადახდილი. ამის მიზეზი იყო ქვეყანის ეკონომიკური კრიზისი, რომელშიც ავღანეთი ჩავარდა თალიბანის ადმინისტრაციისთვის დასავლური მთავრობის მიერ დაწესებული სანქციების გამო. „ევროკავშირის მიერ ყოველთვიურად დაახლოებით 100 აშშ დოლარის ოდენობის სტიპენდიები დაფინანსდება 194, 000 დაწყებითი და საშუალო სკოლის მასწავლებელი იანვარსა და თებერვალში“-ნათქვამია UNICEF-ის განცხადებაში.

შეგახსენებთ, რომ ავღანეთი ეკონომიკურ კრიზისშია მას შემდეგ, რაც თალიბანმა ის დაიპყრო 2021 წლის აგვისტოში, როდესაც უცხოური ძალები გაიყვანეს. ამ დროს ყოფილი მთავრობის მრავალი მაღალჩინოსანი, მათ შორის მაშინდელი პრეზიდენტი აშრაფ ღანი გაიქცა ქვეყნიდან, რამაც ავღანელებს შორის ქაოსი და გაურკვევლობა გამოიწვია. თუმცა მთავრობაში ყველას არ ჰქონდა ქაბულის დატოვების შესაძლებლობა ან სურვილი.

2021 წლის აგვისტო, ათასობით ავღანეთის მოქალაქე და უცხო ქვეყნის მოქალაქე ცდილობს ავღანეთიდან გაქცევას.