წყალტუბოში ერთ დღე-ღამეში 35 ავტომობილი გაძარცვეს, ამის შესახებ ინფორმაციას infoimereti ავრცელებს.

როგორც ადგილობრივები ამბობენ ჩამსხვრეულია ავტომობილების მინები, წაღებულია მაგნიტოფონები და სხვადასხვა ნივთები. რამდენიმე მანქანიდან მოპარულია თანხაც.

“მოგვეშველეთ, დაუცველები ვართ” – ამბობენ გაქურდული ავტომობილების მეპატრონეები და დახმარებას ითხოვენ.

“გეფიცებით შევარდნაძის დროს უფრო დაცულად ვგრძნობდი, თავს ვიდრე ახლა. ეს რა ხდება, ვინმე გვეტყვის?! ყოველი ახალი დღის გათენება გვეშინია, არ ვიცით ვის რა მოპარეს. ხალხო, რაღაც მოვიმოქმედოთ, ასე დავიღუპებით“, - აცხადებს დაზარალებული იზოლდა ჭილაია.

"ყველა გვეუბნება, რომ მანქანის მინებია ჩამსხვრეული. საინტერესოა რას ეძებენ, რას იპოვიან მანქანაში, ხალხს სახლში მისატანი არაფერ აქვს და მანქანაში არ უნდა იპოვონ. როგორ უნდა იყო დაცული, როდესაც ცხვირწინ ცამეტი მანქანა გვემტვრევა და კაციშვილი პატრონი არ არის", - ამბობს ადგილობრივი ეკატერინე ბოლქვაძე.

ადგილობრივების თქმით, პოლიცია არცერთი შემთხვევის ადგილზე ამ დრომდე არ მისულა, თუმცა ნაწილი აცხადებს, რომ პოლიცია შეგნებულად არ გამოიძახეს, რადგან ქურდობის შემთხვევები სხვა დროსაც იყო, თუმცა მათი თქმით, შსს-მ ეს საქმეები ვერ გამოიძია.