პოლიტიკა რუსეთის სპეცსამსახურებს აქვთ კარგად დამუშავებული მეთოდები ე.წ. „სასარგებლო იდიოტების“ გამოყენებისა-მამუკა არეშიძე 2021, 7 აგვისტო, 19:41
"კავკასიური ცენტრის“ ხელმძღვანელი, პროფესორი და პოლიტოლოგი მამუკა არეშიძე:
 90-იანი წლების ბოლოს რუსეთის სათავეში მოსულმა კგბ-ს ყოფილი თანამშრომლებით დაკომპლექტებულმა გუნდმა, რომელსაც ვლადიმერ პუტინი ხელმძღვანელობს, კარგად შეისწავლა ჰიბრიდული ომის პრინციპები და დაიწყო იგივე მეთოდით დასავლეთის წინააღმდეგ ბრძოლა. სწორედ რუსეთის სპეც სამსახურების ანალიტიკური ცენტრების მიერ შექმნილი ნარატივით გამდიდრდა ჰიბრიდული ომის მეთოდოლოგია, იგულისხმება ენერგეტიკული ფაქტორი. მარტივ ენაზე რომ ვთქვათ, დასავლური ალიანსის ნაწილს, ევროპას, აქვს ძლიერი ეკონომიკური რესურსი, მაგრამ მწირი ენერგეტიკული შესაძლებლობები. სწორედ ამ ფაქტორის გამოყენება გადაწყვიტა რუსეთმა.
 იმპერიის ძველი საზღვრების აღდგენის კრემლისეულ პროგრამაში, არც საქართველო არის დავიწყებული და აქაც უნდა ველოდოთ ჰიბრიდული ომისათვის დამახასიათებელი დესტრუქციული პროცესების გააქტიურებას.
შეგვიძლია მაღალი ალბათობით ვთქვათ, რომ კრემლის კვალი საქართველოში მიმდინარე პროცესებში აშკარად ჩანს. დღეს რაც ჩვენს ქვეყანაში ხდება, ატარებს სისტემური ქაოსის ნიშნებს. ამ კონტექსტში უნდა იქნას დანახული: უცხოელებზე თავდასხმის გახშირებული შემთხვევები; ჟურნალისტების დარბევა; ევროკავშირის დროშის დახევა; ყველანაირი საპროტესტო პოტენციალის აქტივაცია (ანტიჰესების კამპანიით დაწყებული და ლგბტ აქტივისტების პროვოკაციული აქციებითა და მათი „მოწინააღმდეგე“ ჯგუფების ძალადობით დამთავრებული).
 რუსეთის სპეცსამსახურებს აქვთ კარგად დამუშავებული მეთოდები არა მხოლოდ პირდაპირი აგენტების, არამედ მათ ინტერესებში მოქმედი მართვადი ინდივიდების და ჯგუფების (ე.წ. „სასარგებლო იდიოტების“) გამოყენებისა.
ზემოთ ვახსენეთ ენერგეტიკა, როგორც რუსეთის გავლენის გაძლიერების ფაქტორი. გავიხსენოთ პოლონეთში, უკრაინაში, აშშ-ში, საქართველოში - რუსეთისათვის არასასურველი ენერგოპროექტების წინააღმდეგ წარმართული კამპანიები, რომლებშიც ჩართული არიან როგორც წესი, ერთი და იგივე საერთაშორისო არასამთავრობო ორგანიზაციები და მათთან მჭიდროდ დაკავშირებული სტრუქტურები. საქართველოში, ერთი და იგივე არასამთავრობოები იბრძოდნენ ბაქო-თბილისი-ჯეიჰანის პროექტის წინააღმდეგ და ნებისმიერი, ქვეყნის ენერგოდამოუკიდებლობისათვის მნიშვნელოვანი სხვა პროექტების (ხუდონჰესი; ნენსკრა ჰესი; ნამოხვანის ჰესი და ა.შ.) წინააღმდეგ და საერთაშორისო „მოკავშირეების“ როლებიც სტერეოტოპულად იყო განაწილებული: საერთაშორისო არასამთავრობოების ქსელი „ბენქვოჩი“ მათი ქართველი პარტნიორებით, „მწვანე ალტერნატივა“ და სოციალური სამართლიანობის ცენტრი (ყოფილი EMC), როგორც „თანამომჩივანი“ მხარე და მათივე ლობირებით - მომრიგებელ მხარედ „ნიდერლანდების გარემოზე ზემოქმედების შეფასების კომისია”.
 ენერგეტიკული პროექტების წინააღმდეგ ბრძოლაში, წმინდა გარემოსდაცვითი ხასიათის არგუმენტებთან ერთად, მომჩივანი მხარე არ მოერიდა ისეთი არგუმენტების გამოყენებასაც, როგორიც არის სვანების ეთნიკური კუთვნილება: გამოცხადდა, რომ სვანები წარმოადგენენ ქართველებისაგან განსხვავებულ „ეთნიკურ ჯგუფს“ - არა „ეთნოგრაფიულ“ ჯგუფს, არამედ სწორედ ეთნიკურად განსხვავებულ ჯგუფს და ევროპული არასამთავრობო ორგანიზაციების დიდ ნაწილში მყარად დამკვიდრდა აზრი, რომ სვანეთი დაპყრობილი აქვს საქართველოს, რომ „არაქართველი“ სვანები განიცდიან ქართველების მხრიდან კოლონიურ ჩაგვრას.
 სხვათა შორის, ეს სტერეოტიპი გამოყენებულია არა მხოლოდ ენერგეტიკული პროექტების წინააღმდეგ საბრძოლველად, არამედ, რაც უფრო სახიფათოა, იმ ძველი რუსული ნარატივის დასამკვიდრებლად, რომ მეგრელები და სვანები ქართველები არ არიან, ეს კი პირდაპირ ემსახურება იმპერიულ პოლიტიკას - „გაყავი და იბატონე“. ოკუპირებულ ტერიტორიაზე მოსახლე ჩვენს თანამემამულეებს პასპორტში უწერენ „სვანი“ ან „მეგრელი“, რომ ხაზი გაუსვან მათ არაქართველობას. ხსენებული არასამთავრობო ორგანიზაციების ამ ნარატივს მხარი აუბა საქართველოს ზოგი წამყვანი ოპოზიციური პოლიტიკური პარტიების წარმომადგენლებმაც (ჩვენთან ხომ ნებისმიერი „საპროტესტო“ ნარატივი განხილულია პარტიების მიერ, როგორც ინსტრუმენტი მთავრობასთან საბრძოლველად და თავისი ელექტორატის გასაზრდელად, ეს ყოველთვის ხდება ზედაპირულად, ქვეყნის ინტერესების გაუთვალისწინებლად).
ჩვენ უნდა განვასხვაოთ ერთმანეთისაგან არასწორად და არაეფექტურად შედგენილი პროექტი და საქართველოს ენერგოუსაფრთხოების საკითხი. გარდა ამისა, ისიც უნდა ვიცოდეთ, ვის და რისთვის სჭირდება ის, რომ საქართველოში ენერგეტიკა არ განვითარდეს არამხოლოდ ჰიდრო, არამედ ზოგადად ენერგეტიკა. წარმოიდგინეთ, თავის დროზე ბაქო-ჯეიჰანის პროექტი რომ არ განხორციელებულიყო, დღეს რა მდგომარეობაში ვიქნებოდით. 580 4-ს მოსწონს
|
  |
Intermedia.ge © 2011-2024 წელი
საავტორო უფლებები დაცულია
 |
