გუჯა შვანგირაძე: "აი, თურმე რატომ დაასვეს თავზე კულტურას წულუკიანი..."

საზოგადოება

2021, 22 ივლისი, 22:42

"აი, თურმე რატომ დაასვეს თავზე კულტურას წულუკიანი.

აი, ამ შენობას ანგრევს. მინისტრის განცხადებით შენობა თურმე აღდგენას არ ექვემდებარება.

პლეხანოვი ვისაც გახსოვთ აღდგენამდე, ვორონცოვის მოედნისკენ მართლა სანახევროდ დანგრეული სახლები იდგა და ისინი გაარემონტეს, გადახურეს, აი, ეს შენობა კი, ხელოვნების მუზეუმი, არც გარედან და არც შიგნიდან ისეთი არაფერი რომ არა სჭირს, და ქალაქის ცენტრში რომ დგას ორასი წელი და რაც მთავარია, კულტურული მემკვიდრეობის ძეგლთა სიაში რომ არის, უნდა დაინგრეს თურმე.

ხო, ასე გამოდის იმ დასკვნიდან კულტურის სამინისტროს საიტზე რომ დევს და სიტყვასიტყვით ასე წერია, შენობის აღდგენა არარენტაბელურიაო.

და რა ხდება?

კულტურის ერთმა მინისტრმა საყდრისის მრავალსაუკუნოვან ოქროს მაღაროს მოუხსნა ძეგლის სტატუსი და აფეთქებაზე გასცა დასტური და მეორე მინისტრი ახლა მეორე ძეგლს მიადგა?

და ერთი ძაღლის თავი ხომ არ არის ჩამარხული ორივე ამბავში და ერთი მამაძაღლისგან ხომ არ მოდის? რა მოდის და ცუდი სუნი არ გცემთ?

საიდან მოდის და ის გაიხსენეთ, ივანიშვილის კუთვნილ ფირმას ჯერ კიდევ 2017 წელს, ერთ ლარად რომ მისცა საკრებულომ თავისუფლების მოდანზე, პუშკინის სკვერთან მიმდებარე ტერიტორია ავტომანქანების სადგომის მოსაწყობად.

იმასაც შეგახსენებთ, რომ იქ, ისევ მისი, ივანიშვილის გიგანტური სასტუმრო "პანორამა " შენდება და რა თქმა უნდა, ავტომანქანის სადგომიც დასჭირდებოდათ.

დასჭირდათ და მისცეს კიდეც ერთ ლარად. დიახ, ერთ ლარად.

მაგრამ საქმეც იმაშია, რომ ის ტერიტორია 30-40 ავტომანქანაზეა გათვლილი, და იმოდენა ნაგებობას არ ეყოფა, ხო?

და თან სადგომის გარდა სხვა რამეებიც სჭირდება გარე ინფრასტრუქტურას.

კიდევ შეგახსენებთ, აქ მშენებარე სასტუმრო, შემადგენელია იმ მრავალფუნქციური კომპლექსისა, რომელმაც სოლოლაკის მაღლობი, სოლოლაკის ბაღები, თავისუფლების მოედანი და ერეკლე II-ის მოედანი უნდა მოიცვას და ერთმანეთს საბაგირო გზებით და დახრილი ლიფტებით უნდა დაუკავშირდეს.