გერმანიაში სეზონური დასაქმების მსურველები ქართველები გაუსაძლის პირობებში აღმოჩდნენ, 100 ათასი მსურველის მიუხედავად გერმანიაში ამ დრომდე მხოლოდ 54 ადამიანი იმყოფება.ბოლო ჯგუფი 9 მაისს წავიდა, თუმცა სამუშაოდ წასულ ქართველებს მოლოდინი არ გაუმართლდათ.

ტელეკომპანია "ფორმულას" ინფორმაციით 18 კაცისგან და 6 ქალისგან შემდგარ ჯგუფი 24 კვადრატულ ბინაში ცხოვრება უწევთ, სადაც საშინელი ანტისანიტარიაა, ხოლო ჭერზე სოკოა ამოსული.

რთული პირობების გარდა, ქართველები იმ ანაზღაურებასაც ვერ იღებენ, რომელიც კონტრაქტით იყო გათვალისწინებული, გერმანიაში სამუშაოდ წასული ჯაბა ჩაჩანიძე ამბობს, რომ "აქ ჩამოსვლამდე გვპირდებოდნენ ანაზღაურებას 9, 5 ევროს და 6 სამუშაო დღეს, აქ ჩამოსვლისას დაგვხვდა რეალობა ანაზღაურება 3 ევრო, თან გვამუშავებდა 4 საათი, დილით სამუშაოს ვიწყებდით 6 საათზე, ხოლო გვაჭმევდნენ საღამოს 8 საათზე",

მოტყუებულმა ქართველებმა დასაქმების ხელშეწყობის სახელმწიფო სააგენტოს და გერმანიაში საკონსულოს მიმართეს, თუმცა 10 დღეა რეაგირება არ ყოფილა, გაუსაძლისი პირობების გამო, რამდენიმე ქართველმა სახელმწიფოს დახმარებით მიღებული სამუშაო უკვე დატოვა.

ქართველების მდგომარეობა დაუჯერებლად მიაჩნიათ სპეციალისტებს, პასუხისმგებლობას დასაქმებაში მონაწილე ორივე მხარეს აკისრებენ და საქმის დეტალური მოკვლევის აუცილებლობაზე საუბრობენ.

"არანორმალურ კი არა ძალიან დამამცირებელ გარემოში მუშაობს ეს ხალხი და შეიძლება კონტრაქტის პირობების შეუსრულებლობასთან გვქონდეს საქმე, უბრალოდ სახელმწიფო მყისიერად უნდა ჩაერიოს ამ საქმეში, რადგან სწორედ მისი დასაქმების სააგენტო იყო კომუნიკატორი"-ამბობს ირაკლი პეტრიაშვილი საქართველოს პროფესიული კავშირების გაერთიანების თავმჯდომარე.

შეგახსენებთ, ამა წლის თებერვალში ჯანდაცვის მინისტრმა ეკატერინე ტიკარაძემ გამოაცხადა, რომ საქართველოს და გერმანიის მთავრობებს შორის დადებული ხელშეკრულების თანახმად გერმანიის შრომის ბაზარზე საქართველოს მოქალაქეებს დროებითი ლეგალური დასაქმება სამი თვით შეეძლებათ, თან გერმანიის მთავრობა მზად იყო სამუშაოს მსურველები განუსაზღვრელი რაოდენობით მიეღო.

გერმანიაში სამუშაოს მსურველი ათიათასობით ადამიანი აღმოჩნდა, თუმცა რეგისტრაციის მიუხედავად მათ უმეტესობას დღემდე არავინ დაკავშირებია.ამის შესახებ სოციალურ ქსელში ამ პროგრამისთვის სპეციალურად შექმნილ ჯგუფში წერენ, რომ მათ იმედიც აღარ აქვთ, რომ სამუშაოზე დაუძახებენ.