საზოგადოებრივი მაუწყებლის ჟურნალისტი სალომე ქოქიაშვილი, რომელიც ცენტრალურ საარჩევნო კომისიასთან გუშინდელ აქციას აშუქებდა, Facebook-ის საკუთარ გვერდზე წუხელ განვითარებულ მოვლენებზე წერს:

"ჯერ ერთმა ლოდმა იფრინა, მერე მეორემ, მესამემ…. მერე ვიღაც მარწმუნებდა, რომ მეჩვენებოდა და მხოლოდ ბოთლები დაფრინავდა ჰაერში… ასეთი ადრეც მინახავს… პოლიციელის ჩაფხუტების ქვეშ შეყრილი სიგარეტის ნამწვები? ეს ნამდვილად პირველად...

მერე წყლის ჭავლი წამოვიდა. მიხვდი, რომ ორი ამოცანა გვქონდა, ერთი მხრიდან ჭავლს უნდა ავრიდებოდით, მეორე მხრიდან მფრინავ ლოდებსა და ცეცხლმოკიდებულ ხის ნაჭრებს. ცეცხლმოკიდებული საგანი მანამდე არ მომხვედრია, კაი დიდი ქვის სიმწარე კი მახსოვს და ამიტომ ძირითად ქვების აცილებაზე ვიყავი ორიენტირებული.

მერე კამერა გაგვეთიშა…. მოფრინავდა და მოფრინავდა ეს ქვები, ძირითადი ნაწილი დანიშნულების ადგილამდე – პოლიციის კორდონამდე აღწევდა, იქიდანაც მოდიოდა საპასუხო ჭავლი. მე და ოპერატორი შუაში ვიდექით უკვე გათიშული კამერით და ბოლო ხმაზე ვკიოდი, ვიღაცებს ფეხებში ვუვარდებოდი ქვა აღარ ისროლოთ, აქციის მონაწილეებს ხვდებათ-მეთქი, ვეხვეწებოდი. მერე მომიბრუნდა ერთი-ორი და შენ საერთოდ ვინ გეკითხებაო, გვითხრეს და ვაკეთებთო. წამოვიდა ის ქვები ჩემსკენ, ლამაზ ეპითეტებთან ერთად. ვიღაცები ჩადგნენ შუაში. შესაძლოა, სხვა ლიდერებიც იყვნენ იქ და მე არ დამინახავს, მაგრამ ვინც დავინახე მათგან, მთელი ამ მოვლენების განმავლობაში დავით ბაქრაძე დასდევდა ამ ქვებმომარჯვებულებს და სთხოვდა გაჩერებულიყვნენ, მართლა ცდილობდა სიტუაციის განმუხტვას, ბოლომდე სიმშვიდისკენ მოუწოდებდა ყველას…სხვა ლიდერებიც მახსოვს, უფრო სწორად მათი ზურგები. რომ გარბოდნენ, არ იყვნენ მაინცდამაინც კარგი სანახავები. სახელებს არ დავწერ, ისედაც ყველა მიხვდება, ყველაფერი რომ დასრულდა, მშვენიერი მშრალი კოსტიუმები ეცვათ.. ჰოო და კიდევ, თავად აქციის მონაწილე ახალგაზრდების ნაწილი, მათ შორის „გირჩის“ ბავშვები შევნიშნე, როგორ ცდილობდნენ სხვები შეეჩერებინათ, ზოგისთვის ქვა გამოერთმიათ, ზოგისთვის ის ცეცხლმოკიდებული ჯოხები, თუ რაც იყო და როგორ სთხოვდნენ სხვებს სიმშვიდე შეინარჩუნეთო, აქ მშვიდობიანი პროტესტისთვის ვართ მისულებიო და მადლობა მათ … ასე იყო ეს ამბავი. ჰო, აი იმათ კი, ვინც ეს ამბები წამოიწყო, ქვები რომ წამოკრიფეს, კორდონს დაუშინეს, ზედ ცეცხლმოკიდებული ხეები თუ ათასი მამაძაღლობა მიაყოლეს, ის მამაძაღლობა საკუთარ პარტკომს ესროლონ, ზუსტად ვიცი, ვინც იყვნენ, სახეზე ვცნობ უმეტესობას!!!

ჰო, ბოლოს ყველაფერი რომ მორჩა და ქვასროლიათა ერთ-ერთ ლიდერს მივადექი, სად იყავი, შენ რატომ არ აჩერებდითქო, დამიანონსა – დაგველოდე, უარესებსაც ვიზამთო“, - წერს საქართველოს პირველი არხის ჟურნალისტი.

გუშინ საპროტესტო აქციის მიმდინარეობისას, ჯანმრთელობის სხვადასხვა ხარისხის დაზიანებები მიიღო 14-მდე სამართალდამცველმა, მედიის 3-მა წარმომადგენელმა და აქციის 10-მდე მონაწილემ. დაშავებულთა ნაწილს პირველადი სამედიცინო დახმარება ადგილზე გაეწია, ნაწილი კი მკურნალობას სხვადასხვა კლინიკაში განაგრძობს.

პოლიციამ 8 ნოემბერს, საპროტესტო აქციაზე, საზოგადოებრივი წესრიგის დარღვევისა და პოლიციის კანონიერი მოთხოვნებისადმი დაუმორჩილებლობის ფაქტზე, ადმინისტრაციული წესით, ჯამში 19 პირი დააკავა.

შინაგან საქმეთა სამინისტრო განაგრძობს მომხდარ ფაქტებზე სამართლებრივ რეაგირებას. სამინისტროს ცენტრალური კრიმინალური პოლიციის დეპარტამენტში სისხლის სამართლის საქმე აღიძრა და ცესკოს ადმინისტრაციული შენობის მიმდებარე ტერიტორიაზე განხორციელებული ჯგუფური ძალადობის ორგანიზების და მასში მონაწილეობის ფაქტებზე გამოძიება საქართველოს სისხლის სამართლის კოდექსის 225-ე მუხლის 1-ლი და მე-2 ნაწილებით მიმდინარეობს.