წუხელ გვიან ღამით გურჯაანის მუნიციპალიტეტის სოფელ ჩუმლაყში წმ.გიორგის სახელობის ეკლესია დაარბიეს და გაძარცვეს, დაზიანებულია ხატები და ჩამსხვრეულია მინები. დანაშაულის შესახებ ადგილობრივებმა დღეს დილით შეიტყვეს. ადგილზე პოლიცია მუშაობს.

ეკლესიის სტიქაროსნის, უჩა ქემაშვილის ინფორმაციით, დაზიანებულია ხატები და წაღებულია შესაწირი.

“დღეს ეკლესიაში მოსულმა, ვნახე რომ საკურთხეველთან ფანჯარა იუო გატეხილი, სავარაუდოდ ქურდები იქიდან არინ შესულები. მაშინვე პოლიცია გამოვიძახე, ”–განუცხადა "კახეთის ხმას" უჩა ქემაშვილმა.

წმინდა გიორგის სახელობის ეკლესიიდან დაახლოებით 50 ლარამდეა წაღებული და ასევე დაზიანებულია ერთ-ერთი ხატი. როგორც ადგილობრივი აღნიშნავს, ხატი მაშინ დაზიანდა, როდესაც დამნაშავე ეკლესიიდან ფანჯრიდან შეღწევას ცდილობდა.

"როგორც ჩანს ფანჯრიდან არიან შესულები იმიტომ, რომ კარები დაკეტილი იყო. პირველ რიგში გადაჭრილი არის ელექტროსადენები, თითქოს ვიდეოკონტროლის შეეშინდათ და გადაჭრეს სადენები. მერე შესულები არიან შიგნით რა თქმა უნდა. როდესაც ფანჯრიდან არის გადასული ეტყობა კანდელზე დაახტა სიბნელეში იყო, თუ დღისით იყო, კანდელია გადმოვარდნილი, " - ამბობს დეკანოზი, ჩუმლაყის წმინდა გიორგის ტაძრის წინამძღვარი მამა გრიგოლ მთვარელიშვილი.​