რომელ ჩვენგანს არ უოცნებია ისეთი დონის კომპანიაში მუშაობაზე, როგორიც, მაგალითად - "Google", "Apple" ან "Pixar" - ია? ზემოთ ჩამოთვლილი კომპანიების კორპორატიულ კაფეტერიებს თავისუფლად შეუძლიათ კონკურენცია მსოფლიოს ნებისმიერ, მოდურ რესტორანს გაუწიონ და სხვა საწარმოების ხელმძღვანელები საკუთარ ქმედებაზე კიდევ ერთხელ დააფიქრონ, რომლებიც ერთგული თანამშრომლებისთვის მოსასვენებელი ოთახისა და მიკროტალღური ღუმლის გარდა, სხვას ვერაფერს იმეტებენ. მოდით, ერთად შევიხედოთ ამ ცნობილი კომპანიების სათაო ოფისებში და საკუთარი თვალით ვნახოთ, თუ რა პირობებში ან რითი იკვებებიან კორპორაციის თანამშრომლები. მერწმუნეთ, მსგავსი მენიუ მსოფლიოს ნებისმიერ წერტილში მდებარე მიშლენის ვარსკვლავის მქონე, პირველი კლასის რესტორანსაც კი შეშურდება.

"Pixar"

ამერიკული კომპიუტერული ანიმაციის კინოსტუდია "Pixar" -ის კაფეტერია - "Cafè Luxo" მაღალი ჭერითა და ბუნებრივი განათებით, ერთ დიდ სივრცეში მდებარეობს, სადაც თოთოეულ ადამიანს შესვლისთანავე კომპანიის მიერ შექმნილი პერსონაჟები, მათ შორის ბაზ ლაიტერი და ვუდი ეგებებიან.

როგორც ცნობილია, სტივ ჯობსის დიდი სურვილი იყო, რომ (სტივ ჯობსი 1986 – 2006 წლებში "პიქსარის" ანიმაციური სტუდიის აღმასრულებელი დირექტორი იყო) ატრიუმი, რომელშიც კაფეტერია არის განთავსებული, პარიზში მდებარე ორსეის მუზეუმის დარბაზის ანალოგი ყოფილიყო.

"Cafè Luxo"-ს კაფეტერიის მენიუ საკმაოდ მრავალფეროვანი პროდუქციით არის წარმოდგენილი - აქ ყველა გემოვნების მქონე ადამიანი საკუთარ გასტრონომიულ მოთხოვნილებებს 100 % დაიკმაყოფილებს.

ორაგული ნეკერჩხლის სიროფში, იაპონური წვნიანი "რამენი" ტოფუსთან ერთად, ჰამბურგერი, შემწვარი რავიოლი, სტეიკი.

კომპანიის თანამშრომლების სრულ განკარგულებაშია ასევე ბურიტო - ბარიც, სადაც მათ როგორც პურის, ასევე ღუმელში შეშაზე გამომცხვარი უგემრიელესი პიცისა და მრავალფეროვანი დესერტის დაგემოვნებაც შეუძლიათ.

სხვა კომპანიების მსგავსად, ასევე "Pixar" - ის კაფეტერიამაც ერთჯერადი ჭურჭლის გამოყენებაზე უარი თქვა. ყველა საკვები, ისევე როგორც რესტორნებში, აქაც თეფშებზეა განთავსებული.

"Google"

"Google"–ის ნიუ–იორკის ოფისის თანამშრომლები კორპორატიულ კაფეტერია - "Hemispheres"-ში სამჯერადი უფასო კვებითა და ხემსით არიან უზრუნველყოფილები.

უფასო საკვების გარდა, ისინი სხვა უამრავ ბონუსსაც იღებენ, მათ შორის, გაწეული ნაყოფიერი მუშაობისთვის კორპორაციის თანამშრომლები სისტემატურად, საკუთარი ხელმძღვანელებისგან უფასო მასაჟითა და სპორტდარბაზის აბონემენტით საჩუქრდებიან.

მენიუში ზოგიერთი კერძი საკმაოდ მაღალკალორიულია, თუმცა კომპანია ჯანსაღი კვების კონცეფციის დაცვას ცდილობს.

მზარეულები მენიუში მუდმივად ისეთ ტრენდულ კერძებს რთავენ, როგორიც მაგალითად - "რამენია" (იაპონური წვნიანი)

"Apple"

კალიფორნიის შტატის ქალაქ კუპერტინოში "Apple Campus"-ის შტაბ-ბინის თანამშრომლებსაც ასევე თავისი კორპორატიული კაფეტერია - "Caffè Macs"-ი აქვთ.

კაფეტერიის მუდმივად განახლებადი მენიუ, ლანჩზე კომპანიის თანამშრომლებს "რამენ" - ბურგერს, "ნაჩოსს", ნეკნებს, თევზს, ქათამს ღვინოში, პიცას, ლოკოკინას, "ფო ბოს", "სუშს", "პაელიას", სტეიკსა და პასტის დიდ არჩევანს სთავაზობს.

"Apple"– ის ხელმძღვანელობამ იმაზეც იზრუნა, რომ წლის თბილ თვეებში საკუთარ თანამშრომლებს სადილობა გარეთ, სუფთა ჰაერზე შესძლებოდათ.

კომპანია თავის კადრებს კვების ხარჯებს მთლიანად ან ნაწილობრივ უნაზღაურებს. მაგალითად, კორპორაცია პროგრამული უზრუნველყოფის დეველოპერებისთვის 12 დოლარამდე გამოყოფს, რომელიც როგორც წესი, მათი სადილის საფასურის ხარჯს მთლიანად ფარავს.

თანამშრომლებს ნოყიერი სადილის შემდეგ, ასევე მადის აღმძვრელი დესერტისა და ორიგინალური ლატეს შეკვეთაც შეუძლიათ.