ფასკუნჯი გვხვდება არამარტო ქართულ, არამედ ზოგიერთი სლავი ხალხის და მითოლოგიასა და ფოლკლორში. ის გონიერი, მოაზროვნე, ზოგჯერ მოლაპარაკეც კია. ამ უნარით, ასევე თავისი ძალმოსილებით, სიდიდით ამჟღავნებს მსგავსებას დრაკონთან, იმ განსხვავებით, რომ ფასკუნჯი სლავურ წარმოდგენებში ჩვეულებრივი, მაგრამ უზარმაზარი ფრინველია, ქართულ წარმოდგენებში კი ის წარმოისახება ლომის ტანით, ამასთანავე ნისკარტით და ფრთებით და ფეხებზე ფრინველისებრი კლანჭებით და არა ფრთოსანი ქვეწარმავლის სახით, როგორც დრაკონი.

ფასკუნჯი დიდ მსგავსებას ავლენს ასევე ევროპულ მითოლოგიურ ფრინველ ფენიქსთან და ირანულ მითოლოგიურ ფრინველ სიმურგთან. ფასკუნჯი უზარმაზარი ძალით და გაუმაძღობით გამოირჩევა. ამ მაგიური არსების ფრთებს განმკურნავი ძალა გააჩნია. ფრთის ერთი შეხებით შეუძლია ჭრილობა განკურნოს.

თუ ვინმეს ხელში ჩაუვარდა მისი ერთ-ერთი ბუმბული, მაშინ გასაჭირში მისი გამოძახება შეუძლია ამ ბუმბულის დაწვით. ფასკუნჯი ქვედა სამყაროში ანუ ქვედა სკნელში ანუ ქვესკნელში ცხოვრობს. მისი ერთადერთი ძლიერი მტერი, რომლისაც თავადაც ეშინია გველეშაპია. გველეშაპი ემტერება ფასკუნჯის სახეობას და როცა მოახერხებს კლავს მის შვილებს.

თუ რომელიმე გმირი ქვესკნელში მოხვდა, მას სწორედ ფასკუნჯი ეხმარება იქიდან შუასკნელში ამოსაღწევად იმ პირობით, თუ მის შვილებს გველეშაპისგან გადაარჩენს და მტრის მოშორებაში დაეხმარება. ფოლკლორში დემითოლოგიზებული ფასკუნჯი ანთროპომორფულ არსებასაც კი ემსგავსება ზოგჯერ. არსებობს აგრეთვე წარმოდგენები ბოროტი ფასკუნჯების შესახებ, რომლებიც სხვა ავსულთა და დევთა მსგავსად მტრობენ კაცთა მოდგმას.

ფასკუნჯის ბარელიეფი გამოსახულია სამთავისის ტაძარზე, რომელიც 1030 წელს შეიქმნა:

ასევე დაგაინტერესებთ:

1. 160 სამეცნიერო სტატია

2. 100 სტატია საქართველოს ისტორიისა და კულტურის შესახებ

3. 64 სტატია საქართველოს ისტორიისა და კულტურის შესახებ

4. 40 სტატია რელიგიის შესახებ

ავტორი: თორნიკე ფხალაძე