„მგონი, ჩემ გარდა არცერთ საგარეო საქმეთა მინისტრს, პრეზიდენტს არც მოლაპარაკებებზე და არც შეხვედრებზე ქართულად არ ულაპარაკია. შეიძლება, შეცდომით ვსაუბრობ ხოლმე, მე არ მაქვს პრეტენზია, რომ ჩემი ქართული უშეცდომოა, მათ შორის ჩემი შვილების მეტყველება, მაგრამ ძალიან ამაყი ვარ, რომ ისინი ქართულად საუბრობენ“, – განაცხადა ზურაბიშვილმა.

მისივე თქმით, თბილისში გამოჩნდნენ ადამიანები, რომლებიც მოსახლეობას მის აგიტატორებად ეცნობიან და ეკითხებიან, თუ რა მოუტანა მათ ევროკავშირმა ან ნატომ. „ხალხს ეს უკვირს და ასკვნის, რომ მე პროევროპელი და პროდასავლელი არ ვყოფილვარ“, – თქვა სალომე ზურაბიშვილმა ამომრჩეველთან შეხვედრაზე.

სალომე ზურაბიშვილი რუსეთის საგარეო საქმეთა მინისტრ სერგეი ლავროვს 2005 წლის მაისში შეხვდა. იმ დროს ზურაბიშვილი საქართველოს საგარეო საქმეთა მინისტრის თანამდებობას იკავებდა.