გახშირებული ხანძრები კახეთში. დედოფლისწყაროში ბოლო ორი დღის განმავლობაში ხანძრის ათამდე შემთხვევა დაფიქსირდა. საერთო ჯამში ე.წ. დიდნაურის ტერიტორიაზე ცეცხლი 20 ჰექტარზე გავრცელდა, სადაც ძირითადად მიწის ის ნაკვეთები დაიწვა, სადაც მარცვლეული უკვე აღებულია. კიდევ 20 ჰექტარი დაიწვა ენამთაშიც. ბოლოს ხანძრის გამომწვევი მიზეზი გაუმართავი კომბაინი გახდა , რის შედეგადაც გლეხების კუთვნილი 3 ჰექტრამდე ხორბლის ყანა განადგურდა. საგანგებო სიტუაციების მართვის სააგენტოს დედოფლისწყაროს ფილიალში ამბობენ, რომ სოფლის მეურნეობის სამინისტროს კუთვნილი კომბაინები არ არის აღჭურვილი ცეცხლმაქრებითა და ნაპერწკალჩამხშობით, რაც აალეებას იწვევს. შემთხვევის ადგილზე მუნიციპალიტეტის ხელმძღვანელებიც იმყოფებოდნენ. დედოფლისწყაროს მერი ამბობს, რომ გასული წლებისგან განსხვავებით მინდვრად საველე მობილური სახანძრო საგუშაგოები ჯერ არ ამოქმედებულა, თუმცა ისინი მალე გაიხსნება.