NBA-ში გამართულ "გოლდენ სტეიტისა" და "საკრამენტო კინგზის" შეხვედრაში, რომელიც მასპინძელთა გამარჯვებით, ანგარიშით 126:101 (34:25, 22:26, 41:22, 29:28) დასრულდა, ნაციონალური საკალათბურთო ასოციაციის ერთბაშად ორი რეკორდი დამყარდა.

რეკორდების ავტორი კლეი ტომპსონია, რომელიც "გოლდენ სტეიტს" ამ მატჩში სულ 52 ქულით შეეწია, აქედან 37-ის ჩაგდება კი მესამე მეოთხედში მოახერხა. მატჩის ამ მონაკვეთში მცველმა თამაშიდან 13-ჯერ (9 სამქულიანი) ისროლა და ყველა ზუსტად. კლეიმ ამ მონაგარს კიდევ 2 ქულა საჯარიმოებით შემატა.

ამით ტომპსონმა ასოციაციის ერთბაშად ორი რეკორდი დაამყარა - ერთ მეოთხედში როგორც ქულების, ისე ზუსტად ნასროლი სამქულიანების რაოდენობის მხრივ.