კანზასის საავადმყოფოს ექიმებმა ახალშობილი სამედიცინო სუპერწებოს გამოყენებით გადაარჩინეს. ეშლინ ჯულიანის მშობლებს 20 დღის ქალიშვილის გაღვიძება რამდენჯერმე გაუძნელდათ... მალევე გოგონას ღებინება დაეწყო. მშობლებმა ეშლინი საავადმყოფოში წაიყვანეს, სადაც პატარას ტვინში ანევრიზმის დიაგნოზი დაუსვეს.

"რადგან ანევრიზმა ახალშობილებში, ფაქტობრივად, არ გვხვდება, ჩვენ შესაბამისი სამედიცინო ინსტრუმენტებიც კი არ გვაქვს. არ ვიცოდით, რა გვეღონა. ასეთ შემთხვევებს წიგნში ვერ წაიკითხავთ. თუ ბავშვს ისე ვუმკურნალებდით, რომ მისთვის ანევრიზმა არ ამოგვეკვეთა, მას გადარჩენის შანსი არ ექნებოდა. ასე რომ, სხვა გზა უნდა გვეპოვა", - აცხადებს ნეიროქირურგი კოჯი ებერსოლი.

სანამ ექიმები ეშლინის გადარჩენის მეთოდებზე მსჯელობდნენ, პატარას ტვინში სისხლი ჩაექცა და ოპერაციამდე კვლავ არსებობდა მისი განმეორების რისკი. ტვინის ანევრიზმის სტანდარტული მკურნალობა თავის ქალის ახდით არის შესაძლებელი, თუმცა ეშლინის ასაკის გამო ეს მიზანშეწონილი არ იყო.

ექიმმა ებერსოლმა გადაწყვიტა, სხვა ხერხისთვის მიემართა. ანევრიზმის ამოსაკვეთად იგი წარმოუდგენელ რისკზე წავიდა და მიმართა მეთოდს, რომელიც აქამდე მხოლოდ უფროსებში იყო ნაცადი - ებერსოლმა პროცედურისთვის სპეციალური სამედიცინო წებო გამოიყენა. ექიმმა თმის ღერივით წვრილი მინი-კათეტერი ეშლინს კისერში გაუკეთა, ანევრიზმამდე მივიდა და წებოთი ამოავსო. ამ ინოვაციურმა პროცედურამ შედეგი გამოიღო. ოპერაციიდან ერთი დღის შემდეგ ეშლინის მდგომარეობა გაუმჯობესდა. პატარას საავადმყოფოდან ერთ კვირაში გაწერენ.