სპარსეთში ადრევე იყო მიღებული პროსკინესის წესი, რომლის მიხედვითაც ყველა სპარსელი თავისი მეფის დანახვაზე პირქვე ემხობოდა, მიწას ჰკოცნიდა და ისე აძლევდა მეფეს სალამს. ჰერმოლაეს შეთქმულების წინ ეს წესი ალექსანდრემ მაკედონიის არმიაშიც შემოიღო. მაკედონელებსა და სამშობლოში დემოკრატიულ ყაიდაზე აღზრდილ ბერძნებს პროსკინესი ეჩვენებოდათ რაღაც ველურ წესად, რაც ესოდენ ამცირებდა ადამიანის თავმოყვარეობასა და ღირსებებს.