ანტიტერორისტული სპეც-ოპერაცია ბერი გაბრიელ სალოსის გამზირზე დასრულებულია.დაახლოებით 18-საათიანი ხმაურიანი შეტაკებების შემდეგ დაკავებულია ერთი დამნაშავე და ლიკვიდირებულია სამი. სამწუხაროდ, დაიღუპა სახელმწიფო უსაფრთხოების სამსახურის ერთი თანამშრომელი და დაიჭრა ორი, დაჭრილია ასევე შინაგან საქმეთა სამინისტროს ორი თანამშრომელი.

დაჯგუფების დაკავებული წევრი ჩეჩენი ეროვნებისაა, სამი ლიკვიდირებული დამნაშავის ეროვნება კი ჯერ-ჯერობით არ ხმაურდება, ცნობილია მხოლოდ, რომ ისინი ქართველები არ არიან.კიდევ ერთი საინტერესო ფაქტი:ბინა, რომელშიც ტერორისტული დაჯგუფების წევრები იმყოფებოდნენ, პანკისის ხეობის სოფელ დუისში მცხოვრები ასლან ჯაბრაელოვის სახელზე იყო 7 წლის წინ, შემდეგ კი ბინა ოჯახის ნათესავზე გადაფორმდა, თუმცა ტერორისტული დაჯგუფების წევრებზე მისი გაქირავება ჯაბრაელოვის ცოლის ძმამ მოახდინა.ჯერჯერობით დაუდგენელია, აქვს თუ არა ჯაბრაელოვს ან მის ცოლის ძმას ტერორისტებთან რაიმე სახის კავშირი, თუმცა არ უნდა დაგვავიწყდეს, რომ პანკისის ხეობელები ახლო ურთიერთობაში არიან ჩეჩენ მებრძოლებთან და ამას რამდენიმე წლის წინ პანკისში ჩატარებული ანტი-ტერორისტული სპეც-ოპერაციაც ადასტურებს.

არაა გამორიცხული, რომ ტერორისტების თბილისში ყოფნაში რუსეთის ხელი ერიოს.ამის ვარაუდის საშუალებას იძლევა 1999 წელს ჩეჩნეთში განვითარებული მოვლენები, როდესაც რუსეთმა ჩრდილოეთ კავკასიაში ტერორიზმის წინააღმდეგ ბრძოლის მოტივით ომი დაიწყო.როგორც მოგვიანებით ალექსანდრე ლიტვინენკო ამტკიცებდა, მოსკოვში განხორციელებული კორპუსის აფეთქებები ჩეჩნებთან არ იყო კავშირში და ის რუსეთის სპეც-სამსახურების ნამოქმედარი იყო.ლიტვინენკო ასევე აღნიშნავდა, რომ ჩეჩნების მიერ დაღესტანში შეჭრაც რუსეთის მიერ დაგეგმილი პროვოკაცია იყო.

ყოველივე ამის გათვალისწინებით, ისმის კითხვა:ხომ არ სურს რუსეთს “ანტიტერორისტული სპეც-ოპერაციის" ჩატარების მოტივით საბრძოლო მოქმედებები დაიწყოს კავკასიაში?