ავღანეთი ეს ის ადგილია, სადაც სქესის თანასწორუფლებიანობაზე ნაკლებად საუბრობენ. 19 წლის ბიბი აიშას შემზარავი წარსულიც ამითაა განპირობებული. აიშას კოშმარული ცხოვრება 16 წლის ასაკში დაიწყო, როდესაც გოგონა საკუთარმა მამამ მომავალი მეუღლის მამასა და 10 ძმას გადასცა. ის წლების განმავლობაში იტანდა ოჯახის წევრებისგან დამცირებასა და სასტიკ მოპყრობას. ამ ხნის განმავლობაში მას მეუღლე არც კი უნახავს, რადგან ის პაკისტანში იბრძოდა.

მუდმივ წამებას გოგონამ ვეღარ გაუძლო, სახლიდან გაიპარა და საკუთარი მშობლების სახლში დაბრუნდა.

ომიდან დაბრუნბულმა ქმარმა ის თალიბის სასამართლოს გადასცა. სასამართლოს მიერ გამოტანილი განაჩენი ქმარმა პირნათლად შეასრულა.

ოჯახის "შემარცხვენელ" ცოლს ცხვირი და ყურები მოაჭრა, რის შემდეგაც მომაკვდავი ბიბი მთებში დატოვა. გოგონას გაუმართლა რადგან ის დროულად იპოვეს და ამერიკაში წაიყვანეს სამკურნალოდ. მის შემთხვევას მსოფლიო პრესა გამოეხმაურა. დასახიჩრებული გოგონას ფოტოები არაერთ ჟურნალში იბეჭდებოდა. აიშა მიიჩნიეს იმ მრავალი მუსულმანი ქალის სახედ, რომლებიც უხმოდ იტანენ მათზე განხორციელებულ ძალადობას და იარებს ჩადრის ქვეშ მალავენ.