თქვენ დადიხართ სავარჯიშოდ სპორტულ დარბაზში, ყიდულობთ მხოლოდ უცხიმო იოგურტებს, მაგრამ სასწორის ისრები მაინც ჯიუტად დგას ერთ ადგილზე? -გასაკვირი არაფერია, რადგან თანამედროვე ადამიანის ცხოვრების წესი სულაც არ უწყობს ხელს ტანადობას.

ამ პოსტში თქვენ შეიტყობთ, თუ რომელი მავნე ჩვევა უწყობს ხელს ზედმეტი კილოგრამების აკრებას და როგორ შეიძლება მათგან თავის დაღწევა.

მუშაობა ოფისში

თუ ოფისში მუშაობთ, თქვენ არამარტო დიდი ხნის განმავლობაში გიწევთ ერთ ადგილზე ჯდომა, არამედ უკონტროლოდ ნთქავთ ტკბილეულს: ფინჯანი ყავა ან ჩაი, რომელსაც სიამოვნებით აყოლებთ ორცხობილას, თანამშრომლების დაბადების დღეების აღსანიშნავად მორთმეული ტორტები, შესვენებაზე ნაუცბადევად გადასანსლული პიცის ნაჭერი... და რატომ გიკვირთ, თუ დღითიდღე გემატებათ კილოგრამები? - სულაც არ გეუბნებით, რომ სამსახურს თავი უნდა დაანებოთ, მაგრამ აუცილებლად უნდა აკონტროლოთ კალორიების რაოდენობა.

შორი გზა სამსახურამდე

სამსახურისაკენ მიმავალი გზის ფეხით გავლა-ეს გარკვეული ფიზიკური ვარჯიშია, ხოლო მეტროთი ან მანქანით გავლილი გრძელი გზა - უმოძრაოდ ყოფნის 30-40 წუთია, რომელიც ხელს უწყობს ცხიმის დაგროვებას. გირჩევთ სახლიდან ათიოდე წუთით ადრე გამოხვიდეთ, რათა ფეხით გზის ნაწილი მაინც გაიაროთ - მანქანა მოშორებით დააყენოთ პარკირებაზე, ან ავტობუსიდან ორიოდე გაჩერებით ადრე ჩამოხვიდეთ.

სამეგობრო წრეში მსუქანი ადამიანების სიჭარბე

ძალიან უცნაურად ჟღერს, მაგრამ თუ თქვენს ირგვლივ ყოველდღიურად ბევრი მსუქანი ადამიანი ტრიალებს, დიდი ალბათობაა იმისა, რომ უახლოეს ხანებში თქვენც მათ დაემსგავსოთ. აქ ლაპარაკია ჩვევაზე, რომლის გამოც თქვენი თანამეინახენი უპირატესობას ანიჭებენ ცხოვრების უმოძრაო წესს და ცხიმიან, მსუყე საკვებს.

ყავის სიყვარული

მწარე შავი ყავა ხელს უწყობს მეტაბოლიზმს და ცხიმების წვას, მაგრამ იშვიათია ადამიანი, რომელიც ასეთ ყავას ანიჭებს უპირატესობას, ხოლო ამ გემრიელ სასმელში დამატებული შაქარი, ნაღები და რძე-ყოველგვარი დიეტის უპირველესი მტერია.

ტკბილი სასმელების ხშირი მირთმევა

ის, რომ ტკბილ გაზიან სასმელებში ბევრი კალორიაა, თითქმის ყველამ იცის, ხოლო ის, რომ ქარხნული შეფუთვის თითქმის ყველა ნაწარმში მათი სოლიდური რაოდენობაა, ბევრი თქვენგანისათვის მოულოდნელობა იქნება: ცივი ჩაი, ნექტარები, ხილის წვენები... სპორტულ იზოტონიკებშიც კი შაქარი უხვი რაოდენობითაა. არ გსურთ, რომ სითხეების საშუალებით ზედმეტი კალორიები დაიმატოთ?– მიირთვით სუფთა წყალი ან ახალგამოწურული ხილის წვენები.

ლიფტით მგზავრობა

ლიფტით სარგებლობის დროს თქვენ კარგავთ შესანიშნავ საშუალებას დაწვათ ზედმეტი კალორიები და შეასრულოთ უმარტივესი ფიზიკური ვარჯიში; ამიტომ, თუ ხელთ მძიმე ჩანთა არ გაქვთ და ფეხზე მაღალქუსლიანი ფეხსაცმელი არ გაცვიათ, ჯობს ფეხით აიაროთ რამოდენიმე სართული.

ძილის უკმარისობა

მეცნიერები ამტკიცებენ, რომ ძილის გამუდმებული უკმარისობა საგრძნობლად ანელებს მეტაბოლიზმს-ეს კი ნიშნავს, რომ ჩვენს მიერ მიღებული კალირიები ნელა გადამუშავდება. უახლესი კვლევების თანახმად, თუ თქვენ დღე-ღამეში 5 საათზე ნაკლები გძინავთ, მაშინ რისკის ქვეშ ხართ ზედმეტი ნახევარი კილოგრამი აკრიფოთ დღე-ღამეში.

გრცხვენიათ, რომ სახლიდან წაიღოთ სამსახურში საუზმე?

პერგამენტის ქაღალდში შეხვეული სენდვიჩი ან პლასტმასის კონტეინერში ჩადებული სალათი გაცილებით სამარცხვინოდ გამოიყურება, ვიდრე ბიზნეს-ლანჩი თანამშრომლებთან ერთად უახლოეს კაფეში?– უნდა იცოდეთ, რომ სახლიდან წაღებული საუზმე გაცილებით ჯანსაღია - თქვენ ხომ თავად შეგიძლიათ გააკონტროლოთ მასში კალორიების რაოდენობა. ყოველ შემთხვევაში, ის იმ პიცაზე მეტად მარგებელია, რომელსაც ოფისის თანამშრომლები ყველაზე ხშირად უკვეთავენ ხოლმე.

გადამეტებული სურვილი უცხიმო საკვების მიღებისა

ცხიმგამოცლილი პროდუქტები არც ისე სასარგებლოა ჯანმრთელობისათვის, როგორც ერთი შეხედვით ჩანს. მართალია, ცხიმი მათში ნაკლებია, მაგრამ მწარმოებლები გემოს გასამდიდრებლად მათ ათასნაირ დანამატებს და შაქარს ამატებენ, რითაც პროდუქტის საერთო კალორიულობა სულაც არ კლებულობს.

საუზმის ან სადილის გამოტოვება

ისევე, როგორც ძილის უკმარისობა, საკვების იშვიათად მიღებაც ანელებს მეტაბოლიზმს და ამასთან ერთად კალორიები იმის ნაცვლად, რომ ენერგიად გადამუშავდეს, ცხიმებად ილექება სხეულში. ასე რომ, იკვებეთ ხშირად და მცირე ულუფებით.

სწრაფად ჭამის ჩვევა

როცა ძალიან სწრაფად მიირთმევთ საჭმელს, გაცილებით მეტს ჭამთ, ვიდრე საჭიროა. ტვინი უბრალოდ ვერ ასწრებს ინფორმაციის გადახარშვას მიღებული საკვების საკმარისობაზე და აგვიანებს სიგნალის მიწოდებას კუჭისთვის, რომ ის უკვე სავსეა.

ალკოჰოლი

გიყვართ საღამოობით მეგობრებთან ერთად ერთი ჭიქა ლიქიორის წრუპვა?- რა თქმა უნდა, ამით ალკოჰოლიკი არასოდეს გახდებით, მაგრამ თქვენს წონას კი სერიოზული საფრთხე დაემუქრება, რადგან ხილისა და ნაღების ტკბილი ლიქიორები გაცილებით მეტ კალორიას შეიცავს, ვიდრე შოკოლადის ფილა.

ტელევიზორის და კომპიუტერის წინ ჭამა

ტელევიზორის ან კომპიუტერის წინ ჭამა გაცილებით ცუდია, ვიდრე ოფისში მირთმეული პიცა, რადგან ფილმის ან საყვარელი ტელეპროგრამის ყურების დროს თქვენი ტვინი დაკავებულია, ამიტომ ის ვერ მოგაწვდით სიგნალს გაძღომის შესახებ, რათა დროულად შეწყვიტოთ სუსნაობა.

სტრესი

მეცნიერებმა აღმოაჩინეს, რომ კორტიზოლის - ეგრეთ წოდებული ''სტრესის ჰორმონის'' მაღალი მაჩვენებელი მადას საგრძნობლად აღვიძებს. გარდა ამისა, ის აძლიერებს მისწრაფებას მავნე საკვებისადმი. ამიტომ, როცა სამსახურში გადატვირთული დღეები გაქვთ და დაძაბულ მუშაობაში ხელი უნებურად გაგირბით ჩანთაში გადამალული შოკოლადის ბატონისაკენ, დროულად შეაჩერეთ ის - შოკოლადი თქვენ კი არა, კორტიზოლს სურს. უკეთესია ფინჯანი უშაქრო ყავითა შემოიფარგლოთ - ენერგიასაც მეტს მიიღებთ და კალორიებიც ნაკლები იქნება.

პ.ს. ყველას გისურვებთ მოხდენილ, ჯანმრთელ გარეგნობასა და სულიერ სიმშვიდეს!