ყოველი ქვეყანა თუ კუთხე განსხვავებულია თავისი წარმომავლობით, ისტორიით, კულტურითა და რაღა თქმა უნდა სამზარეულოთი. განუმეორებელი გემოს გამო კი არამარტო ეროვნული, ესა თუ ის კერძი უკვე საყოველთაო ხდება, რადგან ვინც დააგემოვნა, გაუჭირდა მასთან განშორება. ჩამოთვლა ნამდვილად გამიჭირდება, რადგან დიდია მათი რიცხვი, თუმცა ბოლო დროს ამაზრზენი დელიკატესების რიცხვიც არანაკლები გახდა. დღეს კი მინდა ერთ-ერთ მათგანზე, კერძოდ კი შარდში მოხარშულ კვერცხებზე- ჩინური დელიკატესის მომზადების უცნაურ რიტუალზე გესაუბროდ.

თუ როდისმე ჩინეთში, კერძოდ ქალაქ დონგიანგში მოხვდებით გაზაფხულზე (თუ უკვე არ გქონდათ ასეთი შემთხვევა), აუცილებლად იგრძნობთ თქვენთვის უცნაურ, თუმცა მოსახლეთათვის ნაცნობ, შარდის მძაფრ სუნს. რაც განპირობებულია იმით, რომ ქალაქში ამზადებენ პოპულარულ ადგილობრივ დელიკატესს – ტუნცზიდანს (ბიჭის კვერცხი). 10 წლამდე ბიჭის შარდში მოხარშული ქათმის კვერცხები ქალაქის კულინარიულ ტრადიციად უკვე ასობით წელია თარიღდება და ერთ-ერთი უმნიშვნელოვანესი დელიკატესია.

ალბათ გიჩნდებათ კითხვა თუ სად აგროვებენ საჭირო რაოდენობის, 10 წლამდე ასაკის ბიჭის შარდს? ქალაქის ადგილობრივ სკოლებში, დერეფნებში დგამენ მოსაშარდად რამოდენიმე სათლს, ხოლო დღის მანძილზე კი მოზრდილ ჭურჭელში გადააქვთ. ასევე ითვალისწინებენ იმ ფაქტს, რომ ბავშვი არ უნდა იყოს ავად და შარდი მხოლოდ ჯანმრთელი სხეულიდან უნდა შეგროვდეს.

მას შემდეგ, რაც საჭირო რაოდენობის შარდს შეაგროვებენ, წამოადუღებენ და მოსახარშად მოათავსებენ ქათმის კვერცხებს. ცოტახანში ამ კვერცხებს დაჩეჩქვავენ შარდშივე, რადგან შარდმა უფრო კარგად შეაღწიოს შიგნით და კვერცხები გაიჟღინთოს მისი არომატით.

ამ უცნაური ტრადიციის მიმდევარი ადგილობრივი მოსახლეობის თქმით, ეს დელიკატესი სპეციალური, სამკურნალო ღირებულებებით ხასიათდება. მათივე თქმით შარდი შეიცავს კრისტალებს, რაც ხელს უწყობს სხეულის მაღალი ტემპერატურის კლებას და აჩერებს სისხლდენებს. მაგრამ ქალაქის ადგილობრივი საავადმყოფოს ექიმი Dzhen Huang-ი ყოველთვის უფანტავს მათ ამ მცდარ წარმოდგენას და განმარტავს, რომ შარდი არანაირ სამკურნალო ღირებულებებს არ ატარებს, რადგან მასთან ერთად ორგანიზმიდან გამოედინება მავნე ნივთიერებები. მოსახლეობა კი ფიქრობს, რომ ექიმი მხოლოდ წინააღმდეგია ხალხური ტრადიციების და ამიტომ არ აპირებენ გადააშენონ შარდში მოხარშული კვერცხებით თერაპია. უფრო მეტიც, ისინი დღეში 10 კვერცხამდე მიირთმევენ და ყიდიან კიდეც, რაც საკმაოდ მეტი ღირს, ვიდრე ერთი ჩვეულებრივი კვერცხი. რა თქმა უნდა ჩინეთის ქალაქ დონგიანგში ყველა მოსახლე არ ცნობს ამ ტრადიციას და საბედნიეროდ არიან ისეთებიც, რომელთაც ეს ამაზრზენი დელიკატესი არასოდეს გაუსინჯავთ და არც აპირებენ.