"რუსთავი 2"-ის იუმორისტული გადაცემა "კომედი შოუ" უკვე წლებია აქტუალობას არ კარგავს. ახალ-ახალი სახეები, გადაცემას ახალისებენ, რის გამოც მაყურებელი მოუთმენლად ელის სიცილის რამდენიმე წუთს. გადაცემის ერთ-ერთი ახალი სახე ჭიათურელი ბიჭი დიტო კუპატაძეა. ალბათ გადამეტებული არ იქნება, თუ ვიტყვით, რომ ბოლო რამდენიმე წელია საზოგადოებას ასეთი დიდი სიყვარულით არცერთი იუმორისტი არ მიუღია. მას შეუძლია გააცინოს ყველა, დიდიც და პატარაც, მდიდარიც და ღარიბიც.

ვინ არის კადრს მიღმა ჭიათურელი დიტო კუპატაძე? რეალურ ცხოვრებაში ის არც მეტი და არც ნაკლები, დიტო კუპატაძეა. დიახ, მისი სასცენო სახელი და გვარი გამოგონილი არ გახლავთ. ის "კავეენ"-ის მონაწილე გახლდათ, და მხიარულთა და საზრიანთაკონკურსში ჭიათურის ჯგუფ "მაღაროელების" სახელით ასპარეზობდა. ნიჭიერმა შემსრულებელმა ჟიურის წევრები, რომლებიც ამავე დროს "კომედი შოუს" მსახიობები არიან მალევე მოხიბლა და "კავეენ"-ის სცენიდან "რუსთავი 2"-ის ეთერში გადმოინაცვლა. პროფესიით იურისტია, სოხუმის სახელმწიფო უნივერსიტეტში სწავლობს. ამ პროფესიით მუშაობა არასერიოზულად მიაჩნია, ნაკლებად იზიდავს. ამ ფაკულტეტზე "სადმე ხომ უნდა ჩამებარებინა"-ს მოტივით მოხვდა. ჟურნალისტობის სურვილი ჰქონდა, რადგან ხალხთან ურთიერთობა სიამოვნებს, მაგრამ შესაბამისი ფაკულტეტისთვის ქულები არ ეყო. ის ჯერ მესამე კურსზეა, რადგან გარკვეული პრობლემების გამო აკადემიურის აღებამაც მოუწია. "იუმორისტი ცოტა ხმამაღალი ნათქვამია ჩემზე, მაგრამ ვცდილობ, ახალი გმირები შევქმნა, რაიმე განსხვავებული გავაკეთო. ბავშვებს განსაკუთრებით მოსწონთ ეს პერსონაჟი. რომ მხედავენ, "აუ ჩემი კაიო", მომაძახებენ ხოლმე. დიდები, უბრალოდ, კომპლიმენტებს მეუბნებიან და წარმატებებს მისურვებენ ხოლმე"-ამტკიცებს ის.