მაია ჯაბუას ქალიშვილი ლიზა ყენია ჯერ მხოლოდ 16 წლისაა და მას უკვე მთელი საქართველო იცნობს. სიმღერა ბავშვობიდან დაიწყო. მონაწილეობდა "რუსთავი 2"-ის პროექტ "ანაბანაში", რამდენიმე წლის შემდეგ საბავშვო ევროვიზის შიდაშესარჩევ ტურში გაიმარჯვა და საქართველო კონკურსზე წარადგინა. ახალგაზრდა მომღერალი ტელეკომპანია "იმედის" პროექტ "ნუცას სკოლის" ფინალისტიც გახლდათ, რამდენიმე თვის წინ კი "ახალ საბავშვო ხმაშიც" მიიღო მონაწილეობა. ის ეკა კახიანის გუნდის წევრი გახლდათ. ლიზა ამჟამად პროექტ "ერთი-ერთში" იღებს მონაწილეობას. პროექტის ყველაზე პატარა მონაწილე გამოცდილ მომღერლებს ტოლს არაფერში უდებს.

ლიზა საკმაოდ პოპულარული მომღერალი გახლავთ. მისი თამამი ფოტოები და განცხადებები ყვითელი პრესის ფურცლებზე ხშირად ხვდება, ინტერნეტსივრცეს კი წამებში იპყრობს. თავად ლიზას კი მიაჩნია, რომ მის ფოტოებში სკანდალური არაფერია. "ყოველთვის ჩვეულებრივი ვარ და იმისთვის, რომ ხალხის ყურადღება მივიქციო, არაფერს არ ვაკეთებ. მაგრამ რაც უნდა გავაკეთო, რატომღაც ჩემგან მაინც გამომწვევად ჩანს. არ ვიცი, რატომ ხდება ასე. არასდროს ვიღებ არაესთეტიკურ ფოტოებს. ჩემი სამოსი ისეთია, როგორიც აცვია ნებისმიერ ჩვენგანს"-ამტკიცებს მომღერალი.

მაია ჯაბუას კი ქალიშვილის სკანდალური პოსტები და ფოტოები სულაც არ მოსწონს: "მე ეს არ მომწონს, არ ვიზიარებ, ყოველთვის გვაქვს ამაზე საუბარი, მაგრამ მეორე მხარეც აქვს ამას–ადამიანის ცხოვრებაში დგება ასაკი, როცა სჭირდება თვითდამკვიდრება, საკუთარი აზრის დაფიქსირება, გამოხატვა და ეს ყვალაფერი გარდატეხის ასაკის ბრალია. უნდა მივიღოთ მშვიდად და დავეხმაროთ მშობლები თინეიჯერებს ამ პერიოდის გადალახვაში. რაღაცებში უნდა ჩავერიოთ, რაღაცები ჩვენც უნდა დავუთმოთ".