ცხელი ზაფხულის ყველაზე მნიშვნელოვანი მოვლენა, იურმალას პოპულარული მუსიკის საერთაშორისო კონკურსი ახალგაზრდა
მომღერლებისთვის - “ახალი ტალღა 2014” გუშინ, 22 ივლისს, გალა კონცერტით გაიხსნა და დღეს, 23 ივლისს, უკვე პირველი საკონკურსო დღე იქნება.
ამ კონკურსს ქართველების უმეტესობა როგორც წესი, მოულოდნელად ელის . წელს, საქართველოს, კონკურსზე 17 წლის ნუცა ბუზალაძე წარადგენს, რომელიც თავისი არტისტულობითა და მუსიკალური ნიჭით პროექტ „ერთი ერთში“ ნამდვილად გამოირჩეოდა და სწორედ აქედან დაგვამახსოვრა თავი. აღსანიშნავია, რომ ეს არის პირველი პრეცედენტი, როცა იურმალაში ასეთი პატარა კონკურსანტი იმღერებს.
თბილისში, კონკურსის შიდა შესარჩევ ტურზე ჟიური მოსკოვიდან ჩამოვიდა: ვალერი მელაძე, ალექსანდრ რუმიანცევი და ნასტია ხმელნიკოვა. ქართულ მხარეს კი ჟიურიში რუსა მორჩილაძე და "ახალი ტალღის" წინა წლების მონაწილეები, სოფო ხალვაში და სალომე ქათამაძე წარმოადგენდნენ.
ჟიურიმ 18 ქართველ კონკურსანტს შორის ჯერ 7 შეარჩია, საბოლოოდ კი კანდიდატთა რაოდენობა 2–მდე დავიდა და არჩევანი ნინი ცნობილაძესა და ნუცა ბუზალაძეს შორის ამ უკანასკნელის სასარგებლოდ გაკეთდა. შესარჩევ ტურზე გადაღებული ჩანაწერი ტელეკომპანია "იმედმა" მოსკოვში გაგზავნა. სწორედ ამ ჩანაწერის ნახვის შემდეგ გადაწყდა, რომ კონკურსზე ნუცა ბუზალაძე გავიდოდა.
"ახალი ტალღის" კონკურსზე ნუცას იურმალაში საგულშემატკივროდ პროდიუსერი კახა მამულაშვილი, მომღერალი ლელა წურწუმია და დედა, ნანა კანკავა გაჰყვებიან. რაც შეეხება მის საკონკურსო სიმღერებს, პირველ, მსოფლიო ჰიტების ტურში ის ჯესი ჯეის ცნობილ სიმღერას შეასრულებს. მეორე ტურში "ყვავილების ქვეყანას" სოფო ხალვაშთან ერთად იმღერებს. ხოლო, ბოლო საკონკურსო დღეს, რომელზეც სპეციალურად კონკურსანტისთვის დაწერილი სიმღერა სრულდება, 17 წლის მომღერალი მაია კაჭკაჭიშვილის In My Dreams-ს შეასრულებს.