2012 წელი ძალიან ნაყოფიერი აღმოჩნდა ქართველი ქალბატონებისათვის. ვერა ქობალია, ნანკა კალატოზიშვილი და ნინი ბადურაშვილი, რომ ორსულად არიან უკვე მთელმა საქართველომ იცის. ორსულთა სიას ქართველი მომღერალი, სოფო ხალვაშიც შეემატა. ის სამი თვის ორსულია, თავს მშვენივრად გრძნობს, აქტიურ ცხოვრებას აგრძელებს და დღეშე რამდენიმე საათი ბენდთან ერთად მეცადინეობს. სოფო უკვე 6 წელია მეუღლესთან, მიშა ძოძუაშვილთან ცხოვრობს. წყვილს ერთი ქალიშვილი, 5 წლის ქეთო ჰყავს.

სოფოს ძალიან უნდოდა საკუთარი ბენდი ჰყოლოდა და მეუღლის დახმარებით ოცნებაც აიხდინა. სოფომ ჯერ ბავშვის სქესი არ იცის. ორსულობა დაგეგმილი არ ჰქონია, ეს ღვთის საჩუქარი იყოო. მომღერალი ჭირვეული ფეხმძიმე სულაც არ არის, განსაკუთრებით არაფერი უნდება, გურმანია და თავს არაფერში იზღუდავს. მიშას ძალიან უნდა გვარის გამგრძელებელი, მაგრამ წყვილისთვის მთავარი ბავშვის ჯანმრთელობაა, სქესი მეორეხარისხოვანია. ქეთო სულაც არ ეჭვიანობს, უნდა და ჰყავდეს, მას ხან მარიამს არქმევს, ხან-ბარბარეს. გოგონა დედას ეუბნება, ბავშვი რომ გეყოლება, ის შენი შვილი იყოს და ჩემი შვილი მაიმუნი იქნებაო. ქეთო ყველას უყვება, რომ დედამისს მუცელში პატარა ბავშვი ჰყავს. "შვილი რომ იბადება, ოჯახს დიდ სტიმულს მატებს. ამ სიახლეს სხვანაირი ურთიერთობები მოაქვს, ცოლ-ქმარს შორის დამოკიდებულება ტკბება, თბება, რა არის სიყვარული ასე ვერ აგიხსნით, ღვინოსავითაა, თავიდან მაჭარია და შემდეგ ღვინდება. მე ჩემს ქმარზე ვარ შეყვარებული"-ამბობს სოფო.