ბრიტანელი მულტიმილიონერი მაიკ ლინჩი და მისი 18 წლის ქალიშვილი ჰანა ვერ გადაურჩნენ ხმელთაშუა ზღვაში იახტის ჩაძირვას: მათი ცხედრები მყვინთავებმა სიცილიის სანაპიროზე ჩაძირულ იახტაში იპოვეს. ამის შესახებ ბრიტანულმა გაზეთმა ტელეგრაფი სიცილიური სამოქალაქო თავდაცვის დეპარტამენტის დირექტორ სალვო კოჩინაზე მითითებით იტყობინება, შემდეგ კი ეს ინფორმაცია სხვა მედიასაშუალებებმა გაავრცელეს.

დანარჩენი ოთხი დაკარგული ადამიანის ცხედარი ჯერ კიდევ არ არის ნაპოვნი: Morgan Stanley International-ის ბანკის გამგეობის თავმჯდომარე ჯონათან ბლუმერი, კლიფორდ ჩანსის ადვოკატი კრის მორვილო და მათი ცოლები კვლავ დაკარგულებად არიან ჩამოთვლილნი.

ბრიტანელი ტექნიკური მაგნატის მაიკ ლინჩის ოჯახის კუთვნილი მცურავი სუპერიახტა Bayesian, 19 აგვისტოს ღამეს ტორნადოს ქარიშხლის დროს ჩაიძირა სიცილიის სანაპიროებთან. ავარიის დროს ბორტზე 22 ადამიანი იმყოფებოდა, მათგან 15-მა გაქცევა შეძლო, ექვსი კი დაკარგული იყო. ლინჩის მეუღლე, ანჯელა ბარაკესი მძიმედ დაშავდა, მაგრამ გადარჩა. დღემდე ოფიციალურად მხოლოდ ერთი ადამიანი ითვლებოდა გარდაცვლილად - მზარეული რეკალდო თომასი.

ინციდენტის შემდეგ მალევე დაიწყო ლინჩის ცხოვრებიდან "საეჭვო" დეტალების განხილვა ინტერნეტში, რამაც ბევრს აფიქრებინა, რომ იახტის ჩაძირვა დადგმული იყო. ფაქტია, რომ იახტაზე მომხდარი ტრაგედიის ღამეს იზეიმეს ლინჩის გამარჯვება თაღლითობის სასამართლო პროცესზე, რომელშიც მას ბრალი ედებოდა. სასამართლო პროცესი ექვსი წელი გაგრძელდა და ერთი თვის წინ ლინჩი სრულიად გაამართლეს. იახტაზე მყოფი ყველა, პერსონალის გარდა, დაკავშირებული იყო ამ საქმესთან. გარდა ამისა, ავარიის წინა დღეს ლინჩის ბიზნესპარტნიორი ავტოკატასტროფაში დაიღუპა. თუმცა ხელისუფლება ადამიანურ ფაქტორს ჯერ არ განიხილავს და მომხდარის ოფიციალურ ვერსიად რჩება არახელსაყრელი ამინდის პირობები.

59 წლის მაიკ ლინჩს ხშირად უწოდებენ "ბრიტანეთის ბილ გეიტსს", რაც ხაზს უსვამს მის წვლილს გლობალურ IT ინდუსტრიაში. 1996 წელს მან დააარსა კომპანია Autonomy, რომელიც ამუშავებდა სხვადასხვა პროგრამულ უზრუნველყოფას. კომპანია ძალიან წარმატებული გახდა და 2010-იან წლებში ლინჩმა 11 მილიარდ დოლარად მიჰყიდა ამერიკულ კომპანია Hewlett Packard-ს, უფრო ცნობილი როგორც HP, რომელიც აწარმოებს ლეპტოპებს, პრინტერებს და სხვა აღჭურვილობას. ოთხი წლის შემდეგ, HP-მ არსებობა შეწყვიტა და ლინჩს ამაში ბრალი დასდეს, მის ქმედებებში თაღლითური სქემა დაინახეს. 2015 წელს ლინჩს ბრალი წაუყენეს და სამი წლის შემდეგ სასამართლო პროცესი დაიწყო: ლინჩს მოეთხოვებოდა კომპენსაციის გადახდა 5 მილიარდი დოლარის ოდენობით. ლინჩი 2022 წელს დამნაშავედ ცნეს და 25 წლით თავისუფლების აღკვეთა ემუქრებოდა. თუმცა, 2024 წლის ივნისში საქმის ხელახალი განხილვის დროს, ლინჩი კვლავ გამართლდა: მას ყველა ბრალდება მოეხსნა.