ბრიგადის გენერალი, სამხედრო საჰაერო ძალების სარდლის ყოფილი მოადგილე და სამხედრო ექსპერტი ამირან სალუქვაძე საარქივო ვიდეოს ავრცელებს სოციალურ ქსელში, სადაც ნიკა გვარამია ინტერვიუს იღებს ექს-პრეზიდენტ მიხეილ სააკაშვილისგან და ასეთ მინაწერს ურთავს:

"ქაჯები. ტრამპი თურმე ბიძინამ დააფინანსა, როცა პრეზიდენტი გახდა, და 4 წელი ამერიკას რუსული პროექტი მართავდაო.

თვითონ სჯერათ, თუ მარტო ჩვენ გვაბოლებენ?

სააკაშვილი განაწყენებული იყო. ტრამპმა მოსაწვევი არ მისცა, ბუჩქებიდან უყურა რუსეთის პროექტის ინაუგურაციას.

ახლა ტრამპთან გადაღებულ ფოტოებს ავრცელებს.

ჰკითხეთ ჟურნალისტებმა გვარამიას, ტრამპი აღარაა რუსული პროექტი?

ბოკუჩავა რუსეთის პროექტის ყრილობაზე იყო ჩასული?"

ცნობისთვის, ნიკა გვარამიამ ათიოდე დღის წინ ინტერვიუ მისცა ეკა კვესიტაძეს "მთავარ არხზე", სადაც პარტია „ახლის“ ლიდერს ნიკა გვარამიას კარდინალურად აქვს შეცვლილი რიტორიკა და რუსეთის მიმართებაში სულ სხვაგვარად საუბრობს:

„არის ფრენები საქართველოს მოქალაქეებისთვის კომფორტული, საჭირო და თავსებადი ჩვენს ევროინტეგრაციულ პროცესებთან? იყოს ფრენები. ის, რომ ისტერიული დამოკიდებულება გვქონდეს, რომ არც ივაჭროთ, არც ღვინო წაიღოთ, არც ერთი რუსი არ შემოუშვათ და ასე შემდეგ - ეს ისტერიული დამოკიდებულება არ არის არა მარტო პროპაგანდისტულად რუსეთთან დამოკიდებულებაში გამართლებული, არ არის ზოგადად ის ამოცანა, რომლის დაკვეთასაც გვაძლევენ ქართველები. თუ გვაძლევენ ამ დაკვეთას, მაშინ ჩვენ გავყვებით ამ დაკვეთას“, - განაცხადა ნიკა გვარამიამ ტელეეთერში.

იაგო ხვიჩია ირონიულად გამოეხმაურა გვარამიას ამ განცხადებას:

„როგორც ჩანს, ციხე ცვლის ადამიანებს. გვარამია ციხეში იჯდა და რომ გამოვიდა, თქვა, ადრე ცუდად ვიქცეოდი, დააბრალეთ იმას, რომ მაშინ მაინცდამაინც კარგად არ ვიყავიო. ანუ, პოლიტიკოსი ამბობს, არ ვიყავი კარგად, რაღაცებს ვურევდიო და მე როგორ გავაკრიტიკო ცუდად მყოფი ადამიანი.

მოგეხსენებათ, ჩვენ არასდროს ვყოფილვართ რადიკალები და ვაჭრობა არასდროს დაგვიშლია ქართველი ხალხისთვის. პირიქით, ვამბობდით, რომ თუ რამე მოვალეობა აქვს სახელმწიფოს, არის ის, რომ არ იყოს თავისუფალი მიმოსვლისა და თავისუფალი ვაჭრობის პრობლემა. რაც შეეხება „ქართული ოცნების“ პრაგმატულ პოლიტიკას, მთელ სამყაროს რომ გადაიმტერებ და შენ თვითონ არ იცი რატომ, მე ამას პრაგმატულად ვერ ჩავთვლი. ნიკა გვარამია გამოსწორდა, ადრე ცუდად იქცეოდა და ახლა კარგად იქცევა. ციხეში გამოსწორდა. მადლობა „ქართულ ოცნებას?“ არ ვიცი, როგორც გინდათ, ისე გაიგეთ“, – განაცხადა იაგო ხვიჩიამ