AFP: საუდის არაბეთში ჰაჯის დროს სიცხის გამო 500-ზე მეტი მომლოცველი დაიღუპა.

საუდის არაბეთში სულ მცირე 550 ადამიანი დაიღუპა წმინდა ქალაქ მექაში პილიგრიმობის დროს. მიზეზი უკიდურესი სიცხე გახდა, სამშაბათს რეგიონში ტემპერატურა 50 გრადუსს გადააჭარბა.

დიპლომატებმა განმარტეს, რომ დაღუპულთა ასეთი დიდი რაოდენობის მიზეზი იყო დაურეგისტრირებელი მომლოცველების დიდი რაოდენობა, რომელთა ჩამოსვლამ ქაოსი გამოიწვია მორწმუნეთა ბანაკებში.

დაღუპულთა უმეტესობა ეგვიპტელი იყო.

საუდელმა დიპლომატებმა განაცხადეს, რომ დაღუპულთაგან სულ მცირე 323 ეგვიპტიდან ჩამოსული სტუმარი იყო. ქვეყნის საგარეო საქმეთა სამინისტრომ განაცხადა, რომ კაირო თანამშრომლობს საუდის არაბეთის ხელისუფლებასთან ჰაჯის დროს "უგზო-უკვლოდ დაკარგული" ეგვიპტელების მოსაძებნად.

ასევე დაიღუპა მინიმუმ 60 მომლოცველი იორდანიდან. თეირანმა ოფიციალურად განაცხადა ხუთი ირანელი მომლოცველის დაღუპვის შესახებ, ამის გარდა სამი სენეგალელი მომლოცველი დაიღუპა.

საუდის არაბეთის ხელისუფლებამ კვირას განაცხადა, რომ მათ დახმარება გაუწიეს 2000-ზე მეტ მომლოცველს, რომლებიც განიცდიდნენ სითბურ სტრესს. მხოლოდ იმ დღეს, მათი თქმით, დაფიქსირდა 2700-ზე მეტი "სიცხისგან გამოწვეული დაუძლურება" .

გავრცელებული ინფორმაციით, შარშანდელი ჰაჯის დროსაც მასიური ტრაგედია დატრიალდა, დაფიქსირდა მინიმუმ 240 დაღუპვის შემთხვევა, რომელთა უმეტესობა ინდონეზიელი იყო.

რეგიონში ტემპერატურა 50 გრადუსს გადააჭარბა

საუდის არაბეთის ეროვნული მეტეოროლოგიური ცენტრის ცნობით, ორშაბათს, 17 ივნისს, მექაში დიდ მეჩეთში ტემპერატურამ 51, 8 გრადუსს მიაღწია. მანამდე, კვირას, ქვეყნის ჯანდაცვის სამინისტრომ, რომელიც ჰაჯის დაწყებისთანავე ყველაზე მაღალ ტემპერატურაზე ალაპარაკდა, მომლოცველებს ურჩია, თავი აარიდონ მზეზე ყოფნას ყველაზე ცხელ საათებში, გამოიყენონ ქოლგები და დალიონ ბევრი წყალი.

თუმცა, ჰაჯის მრავალი რიტუალი, მათ შორის არაფატის მთაზე ლოცვა, რომელიც ჩატარდა შაბათს, გულისხმობს მრავალი საათი ღია ცის ქვეშ ყოფნას.