"სამშობლოს ბედი ვენახში წყდება, თქვენ რას აკეთებთ აქ?!

კობახიძის გაშავებას დროებით მორჩნენ, კალაძეზე გადავიდნენ, კალაძის გაშავებას დროებით მორჩნენ, ღარიბაშვილზე გადავიდნენ... ღარიბაშვილის გაშავებას რომ მორჩებიან, ისევ კობახიძეზე გადავლენ, კობახიძის გაშავებას რომ მორჩებიან, ისევ კალაძეზე გადავლენ, კალაძის გაშავებას რომ მორჩებიან, ისევ ღარიბაშვილზე გადავლენ და აეგრე, რააააა, მიდი, მოვდივარ, აეგრე დათარეშობენ ერთ წრეზე!

პერიოდულად შეისვენებენ ხოლმე, ხან ბერაზე გადადიან, ხან ბიძინას ძმაზე, ხან კიდე ბიძინას მეუღლეზე... რაც შეეხება თვით ბიძინა ივანიშვილს, იგი ნებისმიერის გაშავებისას ნოყიერი საფანელია - აშავებენ კობახიძეს? იგულისხმება ივანიშვილიც, აშავებენ კალაძეს? იგულისხმება ივანიშვილიც, აშავებენ ღარიბაშვილს? იგულისხმება ივანიშვილიც.

თემები არ ელევათ... არც გამოელევათ - სადმე მეწყერი ჩამოწვება? სადმე წყალი ადიდდება? სადმე ქარი დაუნერავს? სადმე სეტყვა ჩამოცვივა? კალაძეს დაადანაშაულებენ, იცოდა და ხალხი არ გააფრთხილაო!

ჰელენ გოგიევიჩს რუსული რუბლები ჩაერიცხება? ეგრევე კობახიძეს მიუხტებიან ლექციაზე, შე რუსეთუმევო!

ღარიბაშვილი ამერიკაში რატომ წავიდა შვილის მოსანახულებლადო? თუ წავიდა, აქლემით წასულიყო, ან კიდე ჯორით, თვითმფრინავით რატომ წავიდაო? ეგ კიდე არაფერი... როცა ჩამოვიდა, ცოლს დაბადების დღე რატომ გადაუხადაო? თუ გადაუხადა, რესტორანში რა უნდოდათ, სახლში ვერ გადაუხდიდაო? ან სახლში რატომ უნდა გადაეხადა, რა აუცილებლობა იყოვო?

ჰოდა, რაკი მაინც გადაუხადა, ნება იბოძოს და გადადგესო. თუ არ გადადგება, მაშინ სისხლის სამართლის საქმე აღიძრას იმაზე, რომ ჯერ ამერიკაში გაფრინდა თავის შვილთან, მერე კიდე არც დაიღალა, რესტორანში იქეიფაო. რა, აღარ უშლიანო? მეტიც, მამუკი ხაზარაძემ ბადრი ჯაფარიძესთან ერთად მიიღო გადაწყვეტილება, დაიწყოს იმპიჩმენტის პროცედურა პრემიერ-მინისტრის წინააღმდეგ.

ბარემაც აქვე შეგახსენებთ, რომე... მამუკის პარლამენტში მხოლოდ სამი თავისნაირი ოჩოპინტრე ჰყამს. მთავარია, გული გულობდეს, თორემ რა მნიშვნელობა აქვს, პარლამენტში რამდენი ოჩოპინტრე გყამსო? დაუკვეხნია მამუკის.

ამაზე ჩაილაპარაკებენ ხოლმე კახეთში, თან მიაცვამენ, თან მააცვამენო!

არა, მე განა იმასა ვჩივი, რატომ დადიან წრეზე ეს დარტყმულები?

არა, მე მხოლოდ იმასა ვჩივი, რომ ძვირფას დროს აეგეთ სირთაოზობებში ხარჯავენ და ამ დროი კახეთში ამოდონა ვენახები დასაკრეფია!