პრაქტიკულად, ყველა მებაღე, ან ქოთნის ყვავილების მოყვარული, დროდადრო, ხსნარით სარგებლობს, რომელიც მცენარეების ზრდას ასტიმულირებს. ზოგიერთი მცენარე ხომ ისეთი ჭირვეულია, რომ დახმარების გარეშე, გაზრდა კი არა, ამოსვლაც არ უნდა...

ზრდის სტიმულატორი, ჩვეულებრივ, მცენარის იმუნიტეტს ამაღლებს და ზამთრის გადატანაში ეხმარება, ხოლო წლის თბილ პერიოდში, მის სწრაფ ზრდა-განვითარებას უზრუნველყოფს. ხოლო, მისი გამოყენების შემდეგ, თვალნათლივ შეიმჩნევა მცენარეების ზრდა და კალმების უფრო ძლიერი და ხარისხიანი ფესვთა სისტემის განვითარება.

სპეციალურ მაღაზიებში, მცენარეებისთვის სხვადასხვა სახის სტიმულატორები იყიდება. მაგრამ, როგორიც არ უნდა იყოს, ყოველთვის ისეთი შეგრძნება გვაქვს, რომ შეძენილი საშუალება, მხოლოდ მცენარეებისთვის კი არა, ჩვენთვისაც სახიფათოა. ბევრად უფრო მშვიდად არის ადამიანი, თუ ზუსტად იცის იმ ხსნარის შემადგენლობა, რასაც იყენებს. განსაკუთრებით, სახლის პირობებში, როდესაც საქმე ოჯახის წევრების ჯანმრთელობას ეხება.

ეკოლოგიურად სუფთა ხსნარის მოსამზადებლად, არსებობს ძალიან მარტივი რეცეპტები, რომლის შემცველობაში, ქიმიური ნივთიერება საერთოდ არ იქნება.

1 სუფრის კოვზი ალოეს წვენი გახსენით 250 მლ. თბილ წყალში > გადაასხით ხსნარი მინის ქილაში და ჰერმეტულად დაახურეთ > დადგით ქილა ბნელ და გრილ ადგილზე 1 კვირა > ვადის გასვლის შემდეგ, ხსნარს დაამატეთ იმდენი გადადუღებული (გრილი) წყალი, რომ 5 ლ. გამოვიდეს.

მოათავსეთ მასში მცენარის კალამი ან ბოლქვი, ნიადაგში დარგვის წინ. კალამი 6 სთ-ით, ხოლო ბოლქვი – 12 სთ-ით. დარგვის წინ გადაავლეთ თბილი წყალი.

იმ შემთხვევაში, თუ საქმე რთულად დასაფესვიანებელ მცენარეს ეხება, ტირიფის ტოტების თაიგული მოათავსეთ წყლიან ქილაში. დაელოდეთ რამდენიმე დღე, ვიდრე ტოტებს ფესვები არ გამოუვა. ამის შემდეგ, ხის ტოტები გადაყარეთ. ხოლო, წყალში მოათავსეთ მცენარის კალმები, ისე რომ, 1/3-ზე წყლით დაიფაროს. სულ მალე, კალმებს ფესვები გამოუვა.

ტირიფის წყალი, რთულად გასახარებელი მცენარეების გამრავლების ძალიან ეფექტური საშუალებაა, რომლის გამოყენების შემთხვევაში, შედეგის მიღების გარანტია, თითქმის, 100%-ის ტოლია.

1 ჩ. კ. აფთიაქში ნაყიდი ან 10 წვეთი მცენარის ფოთლიდან გამოწურული ალოეს წვენი გახსენით 1, 5 ლ. ოთახის ტემპერატურაზე დაყენებულ წყალში.

ამ ხსნარით მცენარეების მორწყვა შეგიძლიათ თვეში ერთხელ.

1 გრ. მშრალი საფუარი და 1 ჩ. კ. შაქრის ფხვნილი გახსენით 1 ლ. თბილ წყალში > გააჩერეთ ხსნარი 2 სთ. > ამის შემდეგ, გააზავეთ ის წყალში, პროპორციით – 1:5.

მცენარეები ამ ხსნარით შეგიძლიათ მორწყოთ: ზამთარში – თვეში ერთხელ, ხოლო ზაფხულში – 10 დღეში ერთხელ.

არხის სხვა სიახლეები:

* 35 000 წლის ოქროს წიგნები – აკრძალული არქეოლოგიის არტეფაქტები

* მიწისქვეშა გვირაბები, რომლებიც ერთმანეთთან კონტინენტებს აკავშირებს (ერთი აქვეა, კავკასიაშიც არის)

* უარს ნუ იტყვით ტკბილეულზე, ის ტვინისთვის აუცილებელია – 5 მითი ჯანსაღი კვების შესახებ