სავიზიტო ბარათი, ეტიკეტის თანახმად უნდა იყოს თეთრი, შავი წარწერით. მიღებული არ არის რაიმე ჩარჩო და სხვადასხვა გასალამაზებელი საშუალება. თუმცა თანამედროვე პოლიგრაფიულ ფონზე მოდაში ფერადი სავიზიტო ბარატები შემოვიდა. მაღალ დიპლომატიურ წრეებში კი ავტორიტარულად კვლავ შავ-თეთრი სავიზიტო ბარათები რჩება, გამონაკლისია მაღაზიის სარეკლამო აგენტებისა და მომსახურების სხვა სფეროების წარმომადგენლების ბარათები. ისინი არამარტო უნდა შეიცავდეს მფლობელის კოორდინატებს, არამედ სამუშაო ფირმის შესახებ გარკვეულ სარეკლამო დატვირთვასაც უნდა ატარებდეს.

სავიზიტო ბარათებს შეზღუდული ზომები არ აქვს. სტანდარტული ზომებია: მამაკაცისთვის - 90/50 მილიმეტრი, ხოლო ქალისთვის - 80/40 მილიმეტრი. თუმცა დიდ ბრიტანეთში ქალის სავიზიტო ბარათი უფრო პატარა ზომის უნდა იყოს - 70/35 მილიმეტრი. ყურადღება უნდა მიაქციოთ შრიფტს, პირველ რიგში, უნდა შეარჩიოთ ისეთი შრიფტი, რომელიც ადვილად იკითხება. გამორიცხულია მხატვრული შრიფტი. თანამედროვე პრაქტიკაში გამოიყენება საქმიანი, პირადი, ოჯახური და კომბინირებული (რომელიც შეიცავს, როგორც სამსახურებრივ, ასევე პირად ინფორმაციას) სავიზიტო ბარათები. ყველაზე გავრცელებულია საქმიანი სავიზიტო ბარათი, რომელზეც უნდა იყოს მითითებული სახელი, გვარი, ფირმის ან ორგანიზაციის დასახელება, სადაც მუშაობთ, თანამდებობა, სამსახურებრივი ტელეფონი, ფაქსი, ტელექსი, ელექტრონული ფოსტა და საფოსტო ინდექსი.