ცოტაც და მამაკაცისა და ქალის მოდას შორის ზღვარი მთლიანად წაიშლება, და საქმე სულაც არ გახლავთ იმაში რომ მამაკაცები მაღალ ქუსლებს ირგებენ, როგორც ეს ერთხელ ჯარედ ლეტომ და ლენი კრავიცმა სცადეს, არამედ სწორედ იმაშია რომ ჩვენ თავად "ვესხმით თავს" მამაკაცის გარდერობს, და თან მის ყველაზე ინტიმურ ატრიბუტს - თეთრეულს. გაუგებარია რატომ იწვევდა ფეხმძიმე რიანას საზოგადოებაში ყოველი გამოჩენა ამხელა აჟიოტაჟსა და სენსაციას? ის, რომ ბარბადოსელი ლამაზმანი პატარას მოლოდინს მოდის - კულტად აქცევდა ჯერ კიდევ დიდი ხნის წინ იყო ცნობილი.

ბიუსტჰალტერის ისე დემონსტრაციულად ტარება კი, როგორც ამას მოკრძალებული ემა უოტსონი აკეთებს, არათუ გასაკიცხი არამედ მოდურიც კია, მაშ, რა იყო იმაში დასაძრახი რომ რი ფეხმძიმობის პერიოდში ყველაზე თამამ ლუქებს ირჩევდა?

მომღერალმა სხვათა შორის, სწორედ თავისი პირველი ფეხმძიმობისას ჩაუყარა საფუძველი კიდევ ერთ ტრენდს - მოკრივის აბრეშუმის ტრუსებს.

მოდა განიერ შორტებზე ჯერ კიდევ გასულ წელს გაჩნდა, წელს კი ის მოდის კვირეულზე ოფიციალურად დამტკიცდა: "მიუ მიუ"-ს კოლექციაში გაზაფხულის საკულტო ქვედაბოლოები ატლასის ე.წ. მოკრივის ტრუსებთან არის შერწყმული. მამაკაცის შორტების ტარება ქალურობის ხაზგასასმელად შესაძლებელი და აუცილებელიც კია - ახლა ეს სეზონის სუპერ "ცხელი" ტრენდია.

შეგიძლიათ ის ჩვეულებრივი შორტივით ატაროთ როგორც ეს უკვე რიანამ სცადა ან "მიუ მიუს" შოუში წარმოდგენილი ლუქები გაითვალისწინოთ და ის შარვლის ან ქვედაბოლოს ქვეშიდან მოირგოთ, ისე რომ მისი მხოლოდ ატლასის რეზინა ჩანდეს.

რაც შეეხება ყველაზე გაბედულებს, მათ შეუძლიათ საკუთარი აუთფიტი მამაკაცის საცვლებთან მაქსიმალურად მიახლოებული შორტებით გაახალისონ, ხოლო თუ იმასაც გავითვალისწინებთ როგორ აღმერთებენ მოდის ბლოგერები გარდერობის ამ დეტალს, მაშინ დარწმუნებული ბრძანდებოდეთ რომ ტრენდული ის კიდევ დიდხანს დარჩება, ამიტომ აბრეშუმის ან ბამბის ე.წ. "ბოქციორებს" ყველა შანსი აქვს, თქვენს საგაზაფხულო ჩაცმულობას კიდევ უფრო მეტი მიმზიდველობა და ხიბლი შემატოს.