ანიმაციის დახმარებით თქვენ შეგიძლიათ მიიღოთ წარმოდგენა იმის შესახებ, თუ რამდენად დიდია პლანეტები ერთმანეთთან და მზესთან შედარებით.

პლანეტებისა და მზის მასშტაბების ჭეშმარიტად გასაგებად, ზოგჯერ საჭიროა მხოლოდ პროფესიონალური სამეცნიერო ვიდეოს ყურება. სწორედ ასეთი ვიდეო შექმნა ასტრონომმა ჯეიმს ო'დონოჰიუმ იაპონიის აეროკოსმოსური ძიების სააგენტოდან, იუწყება ScienceAlert-ი.

მეცნიერმა შექმნა ანიმაცია, რომელიც მხოლოდ 45 წამს გრძელდება, მაგრამ ამ დროის განმავლობაში შეგიძლიათ შეაფასოთ ჩვენი მზის სისტემის ძირითადი ობიექტების მასშტაბები და მრავალფეროვნება.

ანიმაცია იწყება ჯუჯა პლანეტა ცერერით და თანდათან ფართოვდება და აჩვენებს ყველა პლანეტას, რომელიც ქმნის ჩვენს ვარსკვლავურ სისტემას, მათ შორის მზეს. ეს ანიმაცია მეცნიერმა თავის ტვიტერზე გამოაქვეყნა, თუმცა მანამდე იგივე ვიდეო გამოაქვეყნა იუთუბზე. ეს არის კიდევ ერთი შეხსენება ასტრონომიის ყველა მოყვარულისთვის, რომ ჩვენი მზის სისტემა ძალიან საოცარი და მრავალფეროვანია.

მაშინაც კი, თუ თქვენ იცით პლანეტების და მზის სავარაუდო ზომები, მაინც საინტერესოა, როგორ უკავშირდებიან ისინი ერთმანეთს. უფრო მეტიც, ანიმაციაში მეცნიერმა აჩვენა კიდევ, რა სიჩქარით ბრუნავენ პლანეტები თავიანთი ღერძის გარშემო. მაგალითად, იუპიტერი ამას დედამიწაზე ბევრად სწრაფად აკეთებს.

ჯეიმს ო’დონოჰიუმ ვიდეოში აჩვენა პლანეტების დახრილობა, მათი ბრუნვის სიჩქარე და ბრუნვის მიმართულება. იმისდა მიუხედავად, რომ მეცნიერმა შექმნა პლანეტებისა და მზის სწორი მასშტაბი ერთმანეთთან შედარებით, მან ეს ობიექტები მაინც მოათავსა გვერდიგვერდ, რაც სინამდვილეში არ ხდება.

თუ ვსაუბრობთ იმ ობიექტების ზომაზე, რომლებიც ნაჩვენებია ანიმაციაში, მაშინ დედამიწას, მაგალითად, აქვს 12742 კმ დიამეტრი. მაშინ როცა იუპიტერი არის 139820 კმ და ეს დიამეტრი 10-ჯერ მეტია, ვიდრე ჩვენს პლანეტას აქვს. ხოლო, მზის დიამეტრი დაახლოებით 1, 39 მილიონი კმ-ია, რაც 100-ჯერ აღემატება დედამიწის დიამეტრს.