ლოდჰის ბაღები არის ფართო გამწვანებული პარკი, რომელიც მდებარეობს დელის გულში, ინდოეთში. მასში განთავსებულია დელის სულთანატის ორი მმართველის, კერძოდ, მუჰამედ შაჰისა და სიკანდერ ლოდჰის მავზოლეუმი, სხვა ნაგებობებთან ერთად. შთამბეჭდავია ბაღი თავისი არქიტექტურითა და უნაკლო ბუნებრივი სილამაზით.

ლოდჰის ბაღების ისტორია 1444 წლით თარიღდება, როდესაც აქ ააგეს დინასტიის უკანასკნელი მმართველის, ალა-უდ-დინ ალამ შაჰის, მოჰამედ შაჰის საფლავი. კიდევ ერთი მნიშვნელოვანი სამარხი, რომელიც მდებარეობს ამ მხარეში, არის სიკანდერ ლოდჰის სამარხი, რომელიც აშენდა 1517 წელს მისი ვაჟის იბრაჰიმ ლოდის მიერ. აქ ასევე აშენდა რამდენიმე სხვა ნაგებობაც სეიდების და ლოდჰის მმართველობის დროს. როდესაც იმპერატორმა აკბარმა დელის ტახტი დაიკავა, მან გამოიყენა ლოდჰის ბაღების ტერიტორია ობსერვატორიად და ჩანაწერები შეინახა ამ მიზნით აშენებულ ბიბლიოთეკაში.

გარკვეული პერიოდის განმავლობაში ამ სამარხების მიმდებარე ტერიტორია ორ სოფელად დაიყო. მხოლოდ 1936 წელს, როდესაც ბრიტანელები იყვნენ ხელისუფლებაში, სოფლის მოსახლეობა გადაიყვანეს ბაღის გასარემონტებლად. ლედი უილინგდონმა, მარკიზ უილინგდონის მეუღლემ (ინდოეთის მაშინდელი გენერალური გუბერნატორის) ტერიტორია მოაწყო და მიმზიდველ ბაღად აქცია. ბაღი ოფიციალურად გაიხსნა 1936 წელს და დაარქვეს სახელი ლედი უილინგდონ პარკი მისი ძალისხმევის საპატივცემულოდ.

როდესაც 1947 წელს, ქვეყანამ დამოუკიდებლობა მოიპოვა ბაღს დაარქვეს ლოდჰის ბაღები. 1968 წელს ბაღი ხელახლა გამწვანდა ამერიკელი არქიტექტორის ჯოზეფ სტეინის ხელმძღვანელობით, რომელმაც ასევე დააარსა ორანჟერეა ბაღში.

ლოდჰის ბაღები მოიცავს 90 ჰექტარზე მეტ ფართობს და მასზე განლაგებულია მე-15 საუკუნის მრავალი ნაგებობა, რომლებიც ასახავს სანახაობრივ არქიტექტურულ სილამაზეს. მუჰამედ შაჰის მავზოლეუმი გამოირჩევა ისლამური და ინდუისტური არქიტექტურული სტილით. შექმნილია რვა პატარა გუმბათოვანი კონსტრუქციით, თითოეული შემკულია ლოტოსის ბოლოებით, კუთხეებში მორთული მწვერვალებით, უზარმაზარი ცენტრალური გუმბათით და რვაკუთხა კამარით, სამარხი საოცარი სანახავია.

სიკანდერ ლოდის მავზოლეუმი შთაგონებულია მუჰამედ შაჰის საფლავიდან. ის აშენებულია ინდო-ისლამურ სტილში, მასაც რვაკუთხა დიზაინი აქვს ცენტრალური გუმბათით, მაგრამ ყოველგვარი ჩატრის გარეშე. მავზოლეუმი ითვლება პირველ დახურულ ბაღის სამარხად ინდოეთში.

დღეს ლოდჰის ბაღები დელიში ერთ-ერთი ყველაზე ისტორიული ადგილია. ის ასევე საყვარელი ადგილია ადგილობრივი მორბენლების, დილით მოსეირნეებისა და იოგას მოყვარულთათვის. ბაღი სასურველი საპიკნიკე ადგილია ოჯახური შეკრებებისთვის, მისი მშვიდი ატმოსფერო ბაღს ერთ-ერთ საუკეთესო ადგილად აქცევს წყვილებისთვისაც, ერთად რომანტიული მომენტების გასატარებლად.

მე-15 საუკუნის მავზოლეუმებისა და სხვა არქიტექტურული კონსტრუქციების გარდა, ამ პარკში ასევე შეგიძლიათ ნახოთ 50-ზე მეტი სახეობის პეპელა და ფრინველი, ასევე 100-ზე მეტი სახეობის ხე. ამჟამად ინდოეთის არქეოლოგიური სამსახური მფარველობს ბაღს. ბაღის მცირე ტერიტორია შემოფარგლულია, როგორც ბონსაის ეროვნული პარკი.