საქართველო
"ცხოვრებამ ბევრჯერ დამანარცხა, მაგრამ ესეთი ვარდნა არასდროს განმიცდია" - რა ფოტოს აქვეყნებს ირაკლი ოქრუაშვილი
2022, 13 მარტი, 18:21
რუსეთ - უკრაინის ომში, საკუთარი ქვეყნისა და უკრაინის დამოუკიდებლობის დასაცავად იარაღით ხელში მებრძოლი პარტია "გამარჯვებული საქართველოსთვის" ლიდერი ირაკლი ოქრუაშვილი სოციალურ ქსელში პოსტს ავრცელებს და იმის შესახებ წერს რომ ვერასდროს წარმოიდგენდა შეიარაღებული ძალების უმცროსი ლეიტენანტი ოდესმე რიგითი თუ გახდებოდა:
"ცხოვრებამ ბევრჯერ ამიყვანა მაღლა და შემდეგ დამანარცხა, მაგრამ ესეთი კარიერული ვარდნა არასდროს განმიცდია. საქართველოს შეიარაღებული ძალების უმცროსი ლეიტენანტი ვიყავი და უკრაინის შეიარაღებული ძალების რიგითი გავხდი. არადა ბილეთი რომ გადმომცეს იმ ქალბატონივით გავიფიქრე CV-ში ამას რომ ჩავწერ საკუთარ თავს ფეხზე წამოვუდგები მეთქი" - წერს ირაკლი ოქრუაშვილი "ფეისბუქის" პირად გვერდზე და სამხედრო ბილეთს აზიარებს:
შეგახსენებთ, რომ თავდაცვის ყოფილი მინისტრი, ირაკლი ოქრუაშვილი უკვე რამდენიმე დღეა მოხალისეებთან ერთად უკრაინაში იმყოფება და მთელი ცივილიზებული სამყაროს მთავარი ბოროტების, რუსეთის წინააღმდეგ იარაღით ხელში იბრძვის. ნახეთ, რა პოსტი დაწერა "გამარჯვებული საქართველოსთვის" ლიდერმა რამდენიმე დღის წინ ფრონტის წინა ხაზიდან:
"ერთი კვირის წინ, უკრაინაში ომის დაწყების წინა დღეს, ტყვიავში ხეივანზე ვიჯექი და ვაზს ვსხლავდი. გამვლელ-გამომვლელი ახლობლები მეტწილად იმას მეკითხებოდნენ ვაზის სხვლის სწავლა როდისღა მოვასწარი, არადა რა სწავლა მაგას უნდა თუ მოინდომე. ზოგი იმას მეუბნებოდა თუ როგორ უკვირთ სოფელში, რომ უშუალოდ მე ვმუშაობ, თანაც ძალიან ბევრს.
მოკლედ, გაგანია ომი მიდის, ვაზს ვსხლავ და ამ უაზრო შექება-კითხვებით და ომის დაწყებით გაბრაზებული საკუთარ თავს ვლანძღავ - რა ჯანდაბას ვაკეთებ ახლა მე აქ, როდესაც იქ ჩვენი ომია და უკრაინელები საქართველოს ბედს წყვეტენ.
შუადღე გადასული იქნებოდა Guram Chalagashvili-მა რომ დამირეკა - თბილისიდან შენთან ჩამოსვლა და დალაპარაკება მინდაო.
ჯერ ისევ ხეივანზე ვიჯექი და სხვლას ვაგრძელებდი რომ მესტუმრა და ცეცხლზე ნავთი დამისხა - როდემდე აპირებ ამ სისულელეებით გართობას, რა შენი საქმე ვაზის სხვლა და ქლიავის ბაღების მოვლააო. სულ გამოვედი მდგომარეობოდან, ჩემი საყვარელი ვაზის მაკრატელი Felco 11 მარჯვნივ მივაგდე, გასაშლელი კიბე მარცხნივ და ახლა უკვე ჯაველინი მიჭირავს ვაზის მაკრატლის მაგივრად.
ალბათ ვერ წარმოვიდგენდი თუ 48 წლის ასაკში საქართველოს თავისუფლებისთვის უკრაინაში ვიბრძოლებდი თანაც იარაღით ხელში.
ვისაც გული გერჩით, თავისუფლების ფასი იცით და მინიმუმ კალაშნიკოვის გამოყენება შეგიძლიათ, ახლა საქართველოს აქ უნდა დაეხმაროთ - უკრაინაში.
პ.ს. არასოდეს დამავიწყდება პოლონეთის საზღვარზე ბევრი შეშინებული ბავშვის თვალები.
#СлаваУкраiнi
No time to die".
