თავდაცვის ყოფილი მინისტრი ირაკლი ოქრუაშვილი თბილისის მერის, კახა კალაძის დედაქალაქის მთავრობის სხდომაზე გაკეთებულ განცხადებას სოციალურ ქსელში ირონიული პოსტით ეხმაურება და მას ვლადიმერ ილიას ძე ლენინის დანატოვარ წარმატების ფორმულას ახსენებს.

"ეგრეა ჯიგაროჯან! ლენინმა შენნაირებისთვის თქვა სამჯერ "სწავლა, სწავლა და სწავლა"-ო, იცოდა რომ ერთჯერ ნათქვამით ვერ ისწავლიდით."- წერს პარტია "გამარჯვებული საქართველოსთვის" ლიდერი ირაკლი ოქრუაშვილი სოციალურ ქსელში.

"ჩემთვის ძალიან დიდი პასუხისმგებლობაა, რომ თბილისის მოსახლეობამ მეორედ მომცა მანდატი და ნდობა, რათა ვემსახურო ამ ქალაქსა და აქ მცხოვრებ ადამიანებს, - ამის შესახებ ქალაქის მერმა, კახა კალაძემ დედაქალაქის მთავრობის სხდომაზე განაცხადა. კალაძის თქმით, გასული 4 წლის განმავლობაში ბევრი კარგი პროექტი განხორციელდა, თუმა გამოწვევები კვლავ არსებობს.

"დედაქალაქის საკრებულომ დაამტკიცა თბილისის მთავრობა და დღეს ოფიციალურად ვიწყებთ დედაქალაქის მართვის ახალ, 4-წლიან პერიოდს. რაც შეეხება განვლილ 4 წელს, 2017 წელს თბილისის მოსახლეობის უმრავლესობამ ჩვენ მოგვცა შესაძლებლობა, გვემსახურა ამ ქალაქისთვის.

რა თქმა უნდა, ბევრი კარგი საქმე გავაკეთეთ, ბევრი ახალი პროექტი, ახალი რეფორმა, ახალი წამოწყება, სიახლეები, ქალაქისთვის მნიშვნელოვანი ბევრი პროექტი განხორციელდა. თუმცა არსებობს გამოწვევები, რომელსაც სჭირდება მოგვარება, ჩემთვის ძალიან დიდი პასუხისმგებლობაა, რომ თბილისის მოსახლეობამ მეორედ მომცა მანდატი და ნდობა, რათა ვემსახურო ამ ქალაქსა და ამ ქალაქში მცხოვრებ ადამიანებს.

დღეს თქვენი აქ ყოფნა ნიშნავს, რომ საზოგადების მხრიდან ჩემდამი გამოვლენილ ნდობასა და პასუხისმგებლობას თითოეულ თქვენგანს გიზიარებთ. დედაქალაქისა და საზოგადოების ინტერესზე მორგებული თითოეული სასიკეთო საქმე იქნება ჩემი მხრიდან წახალისებული. პირობას ვდებ, ჩემ გვერდით დგომას თითოეული თქვენგანი იგრძნობთ საქმით.

ძალიან მნიშვნელოვანია მთავრობის წევრებს ჰქონდეთ მუნიციპალიტეტის ხელმძღვანელის თანადგომა და ეს ასეც იქნება. მაგრამ ყველამ უნდა გაითვალისწინოთ ერთი რამ - აქ ვართ იმისთვის, რომ ვემსახუროთ თბილისს და ამ ქალაქში მცხოვრებ ადამიანებს. ვემსახუროთ - ეს არის პრინციპულად მნიშვნელოვანი.

შეიძლება ბევრისთვის მერობა, დედაქალაქის მთავრობის წევრობა იყოს პრეროგატივა ან ვიღაცისთვის უბრალოდ თანამდებობა, მაგრამ, პირადად ჩემთვის, ეს არის თბილისელების მსახურება და ის უდიდესი პასუხისმგებლობა, რომელიც ქალაქის მოსახლეობის უმრავლესობამ მოგვანიჭა ყველას კარგად გვაქვს გაცნობიერებული. შესაბამისად, ჩვენ უნდა შევუდგეთ საქმის კეთებას. ჩვენთვის ყველაზე მთავარია საქმე, საქმე და საქმე, რაც უამრავია ქალაქში. პრობლემებს, რომელიც წლებია არსებობს, ღირსეული რეაგირება სჭირდება, რათა ყველაფერი მოწესრიგებული იყოს", - განაცხადა კახა კალაძემ.