გასულ წელს, "პლეიბოის" სამყარო 33 წლის მოდელის ეშლი მეთინგლის თვითმკვლელობის სრულიად შემზარავმა ამბავმა მოიცვა. ის არ გახლავთ პირველი ლამაზმანი, ვინც ასეთი ტრაგიკული ბედი გაიზირა. მოდელები, რომლებიც ყველაზე პოპულარული მამაკაცის გამოცემის გარეკანზე წლების განმავლობაში ბრწყინავდნენ, მოულოდნელად ბოროტი ბედისწერის მსხვერპლნი აღმოჩნდნენ, დატოვეს რა თავიანთი ახლობლებისა და გულშემატკივრების გულებში დიდი ტკივილი და მოუშუშებელი იარა. სიკვდილის წინ ყველა თანასწორია - ვარსკვლავებიც და ჩვეულებრივი ადამიანებიც. "Playboy"-ის ზოგიერთი ლამაზმანის ტრაგიკული ბედი მათივე თაყვანისმცემლებისთვის მართლაც რომ შოკისმომგვრელი აღმოჩნდა. ზოგიერთი მოდელი უბედური შემთხვევის შედეგად დაიღუპა, ზოგიც სასტიკი მკვლელის მსხვერპლი გახდა, აი, ზოგმა კი სიცოცხლე საკუთარი ხელით დაასრულა.

სიცოცხლე თვითმკვლელობით დაასრულა

ეშლი მეთინგლი "თვის გოგონა" 2011 წლის მარტში გახდა. 2020 წლის 16 აპრილს კი 33 წლის მოდელი საკუთარ სახლში, ტეხასში გარდაცვლილი იპოვეს. ეშლიმ თავი მოიკლა, სიკვდილამდე კი ჩანაწერი დატოვა.

ლამაზმანი წლების განმავლობაში ალკოჰოლიზმითა და ნარკოდმოკიდებულებით იტანჯებოდა. მოდელის ოჯახმა მისი გარდაცვალება მტკივნეულად გადაიტანა, პოლიცია გარდაცვალების გარემოებების გამოძიებას დღემდე აგრძელებს.

სასტუმროს ფანჯრიდან 7 წლის ვაჟთან ერთად გადახტა

2018 წლის მაისში სტეფანი ადამსმა შვიდი წლის შვილი ჯერ ფანჯრიდან გადააგდო, შემდეგ კი თავადაც გადახტა. 47 წლის მოდელი ყოფილ მეუღლესთან პატარა ვინსენტის მეურვეობისთვის დიდი ხნის განმავლობაში იბრძოდა, ვერაფერს რომ ვერ გახდა მან ჯერ ბავშვი 25-ე სართულიდან გადმოაგდო, რომელსაც უკან თავადაც მიჰყვა.

პოლიციამ მათი ცხედრები სასტუმროს უკანა ეზოში იპოვა. ორმაგმა ტრაგედიამ მთელი მსოფლიო შოკში ჩააგდო. სტეფანიმ "თვის გოგონას" ტიტული 1992 წლის ნოემბერში მიიღო. მოგვიანებით ის მწერალი გახდა, და ასევე კოსმეტიკური საშუალებების მწარმოებელ კომპანიასაც ფლობდა.

დაასახიჩრეს და ჩემოდანში ჩატენეს

ჟასმინ ფიორეს ჯერ სასტიკად სცემეს, შემდეგ დაახრჩვეს და ბოლოს სხეული საშინლად დაუსახიჩრეს. 28 წლის მოდელის ცხედარი 2009 წლის აგვისტოს, კალიფორნიის ერთ – ერთ ჩიხში მდებარე ნაგვის ურნაში, ჩემოდანში მოთავსებული აღმოაჩინეს.

"Playboy"– ის ყოფილ ვარსკვლავს თითები ჰქონდა მოჭრილი და კბილები ამოღებული. პოლიციამ მისი იდენტიფიცირება მხოლოდ სილიკონის მკერდის იმპლანტანებზე დატანებული სერიული ნომრით შეძლო. ლამაზმანის ცხედრის აღმოჩენიდან მალევე პოლიციამ მკვლელობაში ბრალი მის მეუღლეს, 32 წლის რაიან ჯენკინსს წარუდგინა. რამდენიმე დღის შემდეგ ის კანადაში სასტუმროს ნომერში გარდაცვლილი იპოვეს. პოლიცია ვარაუდობს, რომ მან ცოლი მოკლა, შემდეგ კი მართლმსაჯულებისთვის თავის არიდების მიზნით თავი მოიკლა.

ავტოკატასტროფა მაღალი სიჩქარით

ჯეინ მენსფილდი მერლინ მონროსთან საოცარი მსგავსებითა და უზადო, დახვეწილი სხეულით გამოირჩეოდა. "Playboy"- ის მოდელი გასული საუკუნის 50-60-იანი წლების სილამაზისა და სექსუალურობის ეტალონად ითვლებოდა. ჯეინი იყო პირველი მსახიობი, რომელმაც ჰოლივუდის ფილმში სრულიად შიშველმა ითამაშა.

გოგონას სიცოცხლე 34 წლის ასაკში მოულოდნელად შეწყდა. მანქანა, რომელსაც ის მართავდა, ტრაქტორის მისაბმელს დიდი სიჩქარით შეეჯახა. უბედური შემთხვევა 1967 წლის ივნისში, ლუიზიანაში მოხდა. ჯეინი ადგილზე გარდაიცვალა. მანქანაში ლამაზმანის მეგობარი ბიჭი და მძღოლიც იმყოფებოდნენ, რომლებიც ასევე დაიღუპნენ. მოდელს ხუთი შვილი დარჩა.

საწოლში გაგუდვა

ამ მწვანეთვალება ლამაზმანმა "Playboy"-ის მკითხველთა გულები პირველივე გამოჩენისთანავე დაიპყრო. კრისტინა კარლინ-კრაფტი 36 წლის ასაკში დაიღუპა, ის გარდაცვლილი პენსილვანიის სახლში 2018 წლის აგვისტოში იპოვეს.

როგორც მოგვიანებით გაირკვა, მოდელი 31 წლის ჯონათან ჰარისმა საწოლში დაახრჩო. მკვლელმა მსხვერპლს ხელები შეუკრა, რათა მისთვის წინააღმდეგობა არ გაეწია.

კრისტინა არა მხოლოდ "Playboy"- ისთვის, არამედ "Victoria's Secret"-ისა და "Maxim"- ისთვისაც პოზირებდა. მკვლელი ამტკიცებდა, რომ ის ვერ აცნობიერებდა რას სჩადიოდა, რადგან "კეტამინის" ზემოქმედების ქვეშ იმყოფებოდა, თუმცა ამ ფაქტს სასამართლოს გადაწყვეტილებაზე გავლენა არ მოუხდენია. ჰარისს სამუდამო პატიმრობა პირობით ვადამდე გათავისუფლების გარეშე მიესაჯა.

ქმრის მიერ გაუპატიურებული და მოკლული

დოროთი სტრატენი 1980 წელს "წლის გოგონად" დასახელდა. 20 წლის ლამაზმანს "მომავალ მერლინ მონროს" უწოდებდნენ, თუმცა მას სიცოცხლე წლის ბოლომდეც კი არ დასცალდა. ქერათმიანი ლამაზმანი მეუღლემ ჯერ გააუპატიურა, შემდეგ კი ცეცხლსასროლი იარაღიდან გასროლით მოკლა, რომელთან ერთადაც ის უკვე აღარ ცხოვრობდა.

პოლ სნაიდერი მეუღლეს თავს 1980 წლის 14 აგვისტოს ლოს-ანჯელესში დაესხა. ისინი პირისპირ ძალიან მცირე ხნით დარჩნენ ერთად.

მკვლელმა დოროთი მანამდე სცემა, სანამ მას სახეში 12 - კალიბრიანი თოფიდან ესროდა, და სრულიად დაასახიჩრებდა. შემდეგ კი, იარაღი თავისკენ მიმართა. ამბობენ, რომ სნაიდერი მეუღლის მზარდი პოპულარობის გამო ეჭვიანობდა და საშინლად გაბრაზდა როდესაც მოდელმა განქორწინება მოითხოვა.

სიკვდილი აბაზანაში

კასანდრა ლინ ჰენსლი კალიფორნიაში, 2014 წლის იანვარში, აბაზანაში გარდაცვლილი იპოვეს, ორი შვილის დედა 34 წლის გახლდათ.

მოდელი 2006 წლის თებერვალში "თვის გოგონად" დასახელდა. კასანდრა ლინ ჰენსლი კოკაინისა და ალკოჰოლის ზედოზირების შედეგად გარდაიცვალა.

მოგვიანებით კასანდრას მეუღლემ შეიტყო, რომ მან ცხოვრების უკანსკნელი საღამო სხვა მამაკაცთან ერთად გაატარა.

მუმიად ქცეული საკუთარ სახლშივე

ივეტ ვიკერსი "Playboy" - ის ერთ-ერთი ყველაზე პირველი ლამაზმანი გახლდათ. მართალია ის ძალადობრივი სიკვდილით არ გარდაცვლილა, თუმცა მისი აღსასრულიც საკმაოდ შემზარავი იყო.

იმ პერიოდისთვის ქალი უკვე 80 წელს გადაცილებული გახლდათ. მისი მუმიფიცირებული სხეული ლოს-ანჯელესში 2011 წლის აპრილში იპოვეს. ექსპერტიზის შედეგად დადგინდა, რომ მსახიობი და ყოფილი მოდელი გულის უკმარისობისგან მისი სხეულის აღმოჩენამდე ერთი წლით ადრე გარდაიცვალა.

ივეტის ნეშტი მეზობელმა აღმოაჩინა, რომელიც სახლში შევიდა. მან იეჭვა, რომ რაღაც წესრიგში არ იყო, როდესაც დაინახა რომ მსახიობის საფოსტო ყუთში წერილები დროთა განმავლობაში ყვითლდებოდა.