ანჯელინა ჯოლი პირველად, დედა 2004 წელს გახდა. იმ პერიოდისთვის ცნობილი სელებრითი ქორწინებაში ბილი ბობ ტორნტონთან იმყოფებოდა, თუმცა ვარსკვლავურ წყვილს შვილები არ ჰყავდა. ენჯი სამშვიდობო მისიებში აქტიურად იყო ჩართული, სწორედ მორიგი ასეთი ვიზიტისას კამბოჯაში, პლანეტის ერთ - ერთმა ულამაზესმა ქალბატონმა, 7 თვის საოცარი ბიჭუნას - რატ ვიბოლის პირველივე დანახვისთანავე, მტკიცედ გადაწყვიტა - მას პატარა უნდა ეშვილა.

ბილი ბობ ტორნტონმა პატარას მამობა წარმატებით შეითავსა, თუმცა მეუღლესთან დაშორების შემდეგ, ანჯელინა ბიჭუნას ერთადერთი მეურვე გახდა. მას შემდეგ, კი რაც ენჯის ცხოვრებაში ბრედ პიტი გამოჩნდა, მან პატარა მთელი გულით მიიღო და იდეალური მამის როლიც მოირგო, წყვილმა ბიჭუნას სახელი შეუცვალა და მას მედოქს ჯოლი პიტი უწოდა.

მართლია მსახიობი შვილის აღზრდაში ბევრს "სცოდავდა" და მას მეტისმეტად ათამამებდა, მაგრამ რაც ყველაზე მთავრია ბავშვი წლების განმავლობაში დიდ სიყვარულსა და მზრუნველობაში იზრდებოდა. მედოქსი 3 უცხო ენას ფლობს, უკრავს გიტარაზე და აქვს ყველასგან გამორჩეული, უნიკალური სტილი. ვარსკვლავური მშობლების მსგავსად აღმერთებს კინოსა და ზოგჯერ გადაღებებზე დედასაც კი ეხმარება.

მშობლების განქორწინების რთული პროცესის დროს მედოქსმა დედის მხარე დაიკავა. მსახიობი მას ენდობა, სწორედ უფროს შვილს უწოდებს ენჯი თავის საუკეთესო მეგობარს, რომელთანაც სრული ურთიერთგაგება და იდილია აქვს. რთული დასაჯერებელია, რომ მედოქსი უკვე 19 წლის არის. ის დღესდღეობით, კორეის უნივერსიტეტში ბიოინჟინერიას ეუფლება.

როგორც ამბობენ ცნობილმა სელებრითმა უკვე ანდერძიც კი შეადგინა და საკუთარი ქონების უმეტესი ნაწილი სწორედ თავის საყვარელ მედოქსს დაუტოვა. სამწუხაროდ, უფროსი ვაჟის ურთიერთობა მამასთან ვერ აეწყო, ვინაიდან შვილმა ვერ შეძლო ბრედისთვის ის გულისტკენა ეპატიებინა რაც მან დედამისს მიაყენა.