ქალი, რომელსაც ცოლის სტატუსისთვის ერაყის სასამართლომ უვადო პატიმრობა მიუსაჯა

სამოქალაქო

2019, 5 აგვისტო, 20:57

აბდულა, ზეიფულა და ზეინაბი მეცხრე თვეა რაც სახლში, საქართველოში, დედის მშობლებთან საცხოვრებლად ჩამოვიდნენ.

მანამდე რამდენიმე წელი მშობლებთან ერთად ერაყში, ისლამური სახელმწიფოს კონტროლირებად ტერიტორიაზე გაატარეს.

მამა 2007 წელს მოსულში დაეღუპათ, 25 წლის დედა კი ბაღდადში საპყრობილეში აღმოჩნდა, ბავშვებმა დედასთან ერთად ერთი წელი ასევე საპყრობილეში გაატარეს.

მათი ბაბუა ყვება, რომ ბავშვებს დღემდე ეშინიათ ხმების, რომლებიც მათ სროლას აგონებთ. თვითმფრინავი, რომ გადაიფრენს ბავშვები ყვირიან დედა მოდის, დედა მოდისო. გოგონა კი ძილშიც ბუტბუტებს, დედა აქ ვარო.

აკიფ სამადოვის ქალიშვილი შალალა 2012 წელს გათხოვდა. ქორწილის შემდეგ ქმართან ერთად საცხოვრებლად ეკატერინბურგში გადავიდა. მას მერე აკიფს ქალიშვილი აღარ უნახავს.

ერთხელაც შალალამ სახლში დარეკა და თქვა, რომ ერაყში ე. წ. ისლამურ სახელმწიფოში იმყოფებოდა. ქმარმა უფროსი შვილის, აბდულას თან წაყვანაც გადაწყვიტა და დედაც მცირეწლოვანი შვილის გამო ქმარს თან გაჰყვა.

შიგადაშიგ შალალა მშობლებს ეხმიანებოდა, ბავშვებთან ერთად გადაღებულ მოკლე ვიდეოებს უგზავნიდათ.

2017 წელს მოსულის განთავისუფლების შემდეგ ერაყის სასამართლომ მისი ქმარი ერორისტად მიიჩნია. შალალას კი როგორც ტერორისტის ცოლს 20 წლით თავისუფლების აღკვეთა მიუსაჯეს. რა თქმა უნდა შვილებიც დედასთან ერთად იყვნენ ციხეში.

საქართველოს ერაყის ციხიდან ბავშვების დასახსნელად ერთი წელიწადი დასჭირდა. ხელისუფლებას “ იუნისეფი" და “ წითელი ჯვარი" ეხმარებოდნენ. მოლაპარაკებას იუსტიციის სამინისტრო აწარმოებდა.

მინისტრი თეა წულუკიანი ერაყის მთავრობასთან მოლაპარაკების პროცესში ბაღდადის ციხეში შალალასაც შეხვდა.

აკიმ სამადოვს, რომელმაც ქართულ დელეგაციასთან ერთად ბავშვების ჩამოსაყვანად ერაყში ჩაფრინდა, ერაყის ხელისუფლებამ ქალიშვილთან შეხვედრის უფლება არ მისცა.აბდულა, ზეიფულა და ზეინაბი პირველი ბავშვები არიან, რომლებიც საქართველოს ხელისუფლებამ ერაყიდან და სირიიდან სახლში დააბრუნა.

შალალა არის ის პატიმარი, რომელიც მხოლოდ და მხოლოდ ცოლობის სტატუსისთვის აქვს მისჯილი უვადო პატიმრობა.

უცნობია საქართველოს რამდენი მოქალაქე იხდის სასჯელს ტერორიზმთან კავშირის გამო ერაყისა და სირიის ციხეებში.

ისპაჰანი - ქალაქი მუზეუმი, მასჯედ- ე ჯამე _საკრებულო მეჩეთი