როგორც ცნობილია, პატარა ქალაქებს ტურისტების მოზიდვა საკმაოდ უჭირთ, ამიტომ ისინი ტურიზმის გასავითარებლად არაერთ უჩვეულო და ორიგინალურ ხრიკს მიმართავენ. ასე, მაგალითად ლიბანის ერთ- ერთი პატარა ქალაქის, ბრუმანას მერმა, საგზაო პოლიციის ქალ თანამშრომლებს სამუშაო ფორმის შეცვლა და მოკლე შორტების ტარება უბრძანა.

ქალაქის მერის პიერ აჩკარას განცხადებით, ბეირუთთან ტერიტორიული სიახლოვის გამო, მის ქალაქს ტურისტების მოზიდვის საკმაოდ კარგი შანსი ჰქონდა, რომელიც ბრუმანას სოციალურ-ეკონომიკური განვითარებისთვის მას აუცილებლად უნდა გამოეყენებინა. ქალაქის თავი დარწმუნებული იყო, რომ მისი ამ ახალი, ინიციატივის წყალობით, ტურიზმის განვითარებაში მნიშვნელოვანი წვლილის შეტანა, სწორედ პოლიციელი გოგონების საკმაოდ თამამ, საგზაო ფორმას შეეძლო.

აჩკარას ამ გადაწყვეტილებას, არაერთი კრიტიკოსი გამოუჩნდა რომელმაც ის, საჯაროდ გააკრიტიკა. პოლიტიკურ პარტიებში აზრთა სხვადასხვაობა იყო. მაგალითად, კონსერვატორები ამტკიცებდნენ, რომ უცხოელების მოსაზიდად გოგონების გაშიშვლების გადაწყვეტილების მიღება მცდარი იყო, ლიბერალები კი პირიქით, მიიჩნევდნენ, რომ მოკლე შორტის ტარება, ქალბატონების გარდა, ასევე მამაკაც პოლიციელებზეც უნდა გავრცელებულიყო. უცნობია, რამდენად გაიზარდა ბრუმანას საერთო ბიუჯეტი აღნიშნული რეფორმის შედეგად, თუმცა ფაქტი ერთია, მრავალი მოწინააღმდეგის მიუხედავად, თავნება აჩკარას ინიციატივამ დღის სინათლე, საბოლოოდ მაინც იხილა.