მე მხოლოდ 10-15 წელს ვიცოცხლებ. ყოველი წუთი, რომელსაც შენთან ერთად არ ვატარებ, საშინელებაა ჩემთვის. გახსოვდეს ეს!

მომეცი ცოტა დრო, რომ გავიგო, რას ითხოვ ჩემგან. მინდა, რომ სწორად მოვიქცე, უბრალოდ, დამეხმარე იმის გაგებაში, რა არის სწორი. დამეხმარე, რომ შენთვის საუკეთესო ძაღლი გავხდე.

თუ ოდესმე გადაწყვეტ, რომ მატკინო, დაიმახსოვრე, რომ მეც ბევრჯერ შემეძლო შენი ტკენა, მაგრამ არასდროს გამიკეთებია ეს, რადგან ჩემთვის ჩვენი მეგობრობა ყველაფერზე მნიშვნელოვანია.

არ ჩამკეტო ოთახში და თუ რამეს დავაშავებ, დასასჯელად არ დამაიგნორო. შენ ოჯახი და მეგობრები გყავს, სამსახური და ჰობი გაქვს, მე კი მხოლოდ შენ მყავხარ.

დაიმსახურე ჩემი ნდობა, ეს ჩემთვის მთელ სამყაროს უდრის და გთხოვ, არასდროს შემატანინო ეჭვი შენში.

შენს ენაზე საუბარი არ შემიძლია, მაგრამ ვცდილობ, სხეულის ჟესტებით გამოვხატო ჩემი გრძნობები. მიაქციე ამას ყურადღება.

დაიმახსოვრე, არასდროს დამავიწყდება, როგორ მექცეოდნენ. პატიება შემიძლია, მაგრამ ვერ დავივიწყებ. ჩვენი შეხვედრის პირველი დღიდან ისე მიყვარხარ, მეტი რომ არ შეიძლება, მაგრამ გთხოვ, ბოროტად ნუ ისარგებლებ ამით.

თუ ვიცელქებ, ძალიან ნუ გამიბრაზდები. მე პატარა ბავშვივით ვარ, დამეხმარე გაზრდაში.

მელაპარაკე. შეიძლება ყველა სიტყვა არ მესმოდეს, მაგრამ შენს ხმას ვცნობ და შენი მოსმენა მთელ სამყაროს უდრის ჩემთვის.

გთხოვ, გამიხეხე ხოლმე კბილები, ამას თავად ვერ გავაკეთებ. ამას თუ ლეკვობიდანვე შემაჩვევ, მივეჩვევი და შენი მადლობელი ვიქნები.

გახსოვდეს, რომ ზოგი რამ, რასაც შენ ჭამ, შეიძლება ჩემთვის მომწამლავი აღმოჩნდეს. ისე, უკეთესი იქნება, თუ შენს საჭმელს საერთოდ არ მომცემ. ამას იმიტომ გთხოვ, რომ ადამიანების საკვები გემრიელად კი გამოიყურება და კარგი სუნი აქვს, მაგრამ შეიძლება გამასუქოს, რაც ჩემი ჯანმრთელობისთვის ცუდი იქნება.

თუ შეამჩნევ, რომ ისეთი ენერგიული აღარ ვარ, როგორიც ვიყავი, ნუ იქნები იმედგაცრუებული და ნუ გამიბრაზდები. შეიძლება თავს კარგად არ ვგრძნობ, შეიძლება ავად ვარ, შეიძლება ცუდი საჭმელი ვჭამე, შეიძლება ჩემმა გულმა დაბერება დაიწყო...

გთხოვ, მომიარე და იზრუნე ჩემზე, როცა დავბერდები. ერთ დღეს ხომ შენც დაბერდები. ძალიან ვწუხვარ, რომ მალე ვბერდები და ამით შეიძლება შენც გაწყენინო, მაგრამ რა ვქნა, ამის შეცვლა არ შემიძლია.

თუ რთული გადაწყვეტილების მიღება მოგიწევს, გთხოვ, დარჩი ჩემთან. ნუ იტყვი: "ეს ძალიან რთულია, ვერ შევძლებ ყურებას".

მეც მეშინია. მაგრამ ყველაფერთან შევძლებ გამკლავებას, თუ შენ მეყოლები გვერდით...

ყოველთვის დარჩი ჩემთან...

p.s. ვეცადოთ, გავუფრთხილდეთ ერთმანეთს, გავუფრთხილდეთ ყველა ცხოველს და ყველა ძაღლს, რადგან ყველა სულიერი შექმნილია სიყვარულისთვის.

ასევე დაგაინტერესებთ:

1. როგორ გამოხატავს ძაღლი სიყვარულს - 11 აშკარა ნიშანი

2. მეცნიერებმა დაამტკიცეს, რომ ძაღლებს ცუდი ადამიანების ცნობა შეუძლიათ

3. როგორ ცვლის უსახლკარო ცხოველებს ზრუნვა და სიყვარული