მოგეხსენებათ, ფილმი “ექვთიმე ღვთისკაცი" — ისტორიულ-ბიოგრაფიული ფილმია, რომლის პრემიერა ამა წლის 20 იანვარს გაიმართა.

26 სექტემბერს ქიაჩელის ქუჩაზე შედგა ქართული ფილმის კინოჩვენება, რომელსაც მხოლოდ ის ადამიანები ესწრებოდნენ, ვინც წვლილი შეიტანეს და ფინანსური მხარდაერა გაუწიეს ამ მამულიშვილური ფილმის გადაღებას. ფილმის პრეზენტაცია თავად რეჟისორმა, ნიკოლოზ ხომასურიძემ წარმართა.

ჩვენებას ესწრებოდა ფილმის ოპერატორი, ოსკაროსანი, მსოფლიოს არაერთი ფილმის და მათ შორის ფილმ “სპაიდერმენის' ოპერატორი - ბატონი კიმი.

დასაწყისში რეჟისორმა ისაუბრა ფილმის შესახებ. თუ როგორ შეიქმნა ფილმი. დიდი აღტაცებით გაიხსენა ის მომენტი, რომელიც მას მყინვარწვერზე ასვლისას შეემთხვა. ეს რაღაც ღვთის ნიშნად და სასწაულებრივ დამთხევად მიიჩნია მან.

“ეკლესიაში, რომელიც 4 000 მეტრზეა, ექვთიმეს დროშის ატანას ვაპირებდი. მზის ამოსვლის სანახავად გამოვედი, საოცარი სანახაობა იყო და ამ დროს დავინახე მღვდელი. მივესალმეთ ერთმანეთს, შოკოლადი შემომთავაზა, დავიწყეთ საუბარი. ბოლოს ვკითხე: მამაო, თქვენი სახელი, როგორ მოგმართოთ-მეთქი. შემომხედა და მეუბნება: ექვთიმე... შანსი არ არის-მეთქი, წამოვფრინდი, გამივარდა ხელიდან ფოტოაპარატი – 3 600 მეტრის სიმაღლეზე ვარ, დილის 6 საათია და ამ დროს გვერდით ექვთიმე მიზის, თან მღვდელი. აუ, ეს რა სასწაულია, რა ხდება ჩემს თავს-მეთქი. გადაირია ადამიანი: მანამდე მშვიდად ვესაუბრებოდი და ახლა რა დაემართაო. ემოციებისგან წინ და უკან დავრბოდი. ბოლოს დავჯექი: მაპატიეთ, ავღელდი, ექვთიმეს ფილმის გადაღებები დავიწყე, ექვთიმეს დროშა მყინვარწვერზე უნდა ავიტანო და ამ დროს დილის 6 საათზე, ექვთიმე გვერდით მიზის – ჩემთვის პირდაპირ ექვთიმე თაყაიშვილის გამოცხადება ხართ, ასეთი სასწაული არასდროს მინახავს-მეთქი. ეს მართლაც მაგარი ამბავიაო – მითხრა და დაგვლოცა. ეკლესიასთან ავედით და მე და მამა ექვთიმემ გავშალეთ დროშა. შემდეგ უკვე მყინვარწვერზე ავედი. მე ასეთი საქართველო არსად მინახავს, ეს გზა ყველა ქართველმა უნდა გაიაროს. სულ სხვა სამყაროს ნახავ, გამოცდი საკუთარ თავს, დააფასებ ყოველ წამს, ლუკმას, წყალს, ჰაერს, შენში დიდი გარდასახვა ხდება, ისეთი სირთულეების გადალახვა გიწევს – ეს საკუთარ თავზე გამარჯვებაა.''- გაიხსენა ნიკოლოზ ხომასურიძემ.

აღსანიშნავია, რომ მთავრობამ ფილმის გადაღება არ დააფინანსა და საუბარი წარიმართა იმაზე, თუ რა ძალისხმევა დასჭირდა იმისთვის, რომ ფილმი გადაეღო.

ფილმის მთავარ გმირს -ექვთიმეს როლს რეზო ჩხიკვიშვილი თამაშობს, რომელიც მოგეხსენებათ, საზღვარგარეთ მოღვაწეობს. თითქმის 18 ჯერ მოუხდა მსახიობს ფილმის გადაღებისთვის საქართველოში ჩამოფრენა, რადგან უსახსრობის გამო ვერ ხერხდებოდა გადაღება. ფინანსების გაჩენისთანავე უკავშირდებოდა რეჟისორი მსახიობს და ისიც მზად იყო ჩამოსასვლელად.

რეჟისორმა ისიც აღნიშნა, რომ ფილმის შექმნაში 7000-მა ადამიანმა მიიღო მონაწილეობა. მადლიერება გამოხატა იმ ადამიანების მიმართ, ვინც დახმარების ხელი გაუწოდა მათ. ფილმი იმდენად ამაღელვებელია, შეუძლებელია, პატრიოტული გრძნობით არ განიმსჭვალო და ტანში ჟრუანტელმა არ მოგგვაროს. ფილმის დასასრულს ვერც ერთმა დამსწრე საზოგადოებამ თავი ვერ შეიკავა და ყველა ერთიანად აქვითინდა.

ჩვენების შემდეც ისიც აღინიშნა, რომ აუცილებელია ამ ფილმის ჩვენება სკოლებშიც მოხდეს, რათა გაეცნოს მომავალი თაობა ქართულ ისტორიას და უფრო გაღვივდეს მამულიშვილური სულისკვეთება.

დასასრულს, რეჟისორმა აღნიშნა, რომ მან ისევე ტანჯვით შექმნა ეს ფილმი 3 წლის განმავლობაში, როგორც იტანჯა ექვთიმე თაყაიშვილი საქართველოს ეროვნული საგანძურის შენარჩუნებისთვის. ეს ნამდვილად დასაფასებელია.

დასასრულს კი ისაუბრა მომავალი გეგმების შესახებ, რომელიც ფილმის “დიდგორი" გადაღებას უკავშირდება და კვლავ ქართული საზოგადოების თანადგომის იმედი აქვს. იქ დამსწრე საზოგადოებამ კი, თავის მხრის, ფინანსური დახმარების მხარდაჭერა აღუთქვა.

წარმატება ვუსურვოთ ამ დიდბულ და მართლაც თავდადებულ რეჟისორს!!!