უკვე წელიწადზე მეტია, რაც ქალაქ ბოლნისის მოსახლეობა შეწუხებულია იმ ფაქტით, რომ სისტემატურად მიმდინარეობს სახლების ძარცვა. კერძოდ კი ოქროულობის. უკვე 30-ზე მეტი სახლი მაინც გაიძარცვა. თანაც საოცარი ისაა, რომ ოქრო სახლიდან ზედმეტი ძალისხმევის გარეშე, უპრობლემოდ გააქვთ და სამალავსაც ადვილად პოულობენ. ადგილობრივი მოსახლეობას ეჭვი აქვს, რომ მძარცველები ოქროს ამომცნობი აპარატით ახერხებენ ამას.

მძარცველები ოჯახებში მაშინ შედიან, როდესაც ადგილობრივი ბინადარი სახლში იმყოფება. ამას, მოსახლეობის თქმით, ჰაერში დასაძინებელი გაზით ახერხებენ.

მძარცველები ისე გათავხედდნენ, რომ ერთ-ერთი ოჯახის გაძარცვისას სადილსაც კი შეექცენ გემრიელად. და ეს საძილე გაზით გაბრუებულმა დიასახლისმა დაინახა ლანდივით.

ხოლო სხვა მოსახლე ჩივის, რომ მისი სახლიდან წინა დღით დანიშნული ახალგაზრდა გოგონას მთელი ოქროულობა გაიტანეს. ესეც არ აკმარეს და მანქანის ნაწილებიც გააყოლეს ხელს.

პოლიციამ თითქოს ძარცვის ბრალდებით რამოდენიმე ახალგაზრდა დააკავა, მაგრამ მტკიცებულების არ არსებობის გამო გაანთავისუფლეს. ძარცვის სერიები კი კვლავ გრძელდება. 22 სექტემბერს კოდევ ერთი სახლი გაიძარცვა. ამაზე ბევრი დაიწერა ფეისბუქ გვერდზეც და არაერთი გამოხმაურებაც მოჰყვა.

“კიდევ ერთი სახლი გაუსუფთავებიათ “ქურდბაცაცებს". ისე მიეჩვიენ მალე ერთმანეთის სახლებს გაძარცვავენ! ბოლნისი ამას ეგუება?'' -წერს ბოლნისის მკვიდრი, ქომაგი, პოეტი და “ბოლნისის ჰიმნის'' ავტორი-ქალბატონი ხათუნა ქარაია, რომელიც იტალიაშია ემიგრაციაში იმყოფება.

ეს ქურდბაცაცები კი უპრობლემოდ ძარცვავენ ხალხის ნაოფლარს, რომლებიც ოჯახებს მონატრებული, ორიოდე გროშის საშოვნელად სამუშაოდ არიან გადახვეწილნი.

ბოლნისელი ხარ? მაშ, ყოფილხარ ორგზის ქართველი!

რას ვფიქრობ ჩემო ფბ და...ვფიქრობ, მეცამეტე წელი მიდის უცხოობაში და მაქვს თუ არა იმის ხმამაღლა თქმის უფლება რასაც ვფიქრობ?! მე ვიტყვი მაინც. რადგან ვთვლი, რომ უთქმელობა დანაშაულის ტოლფასია ამ შემთხვევაში.
შენ ხომ მაინც იცი, ჩემო ფბ, რომ ამ ხნის მანძილზე ჩემი ფიქრი და გონება არასოდეს მოცილებია ბოლნისს. ჰოდა, ისეთი პოსტი წავიკითხე წინა დღეს, საგონებელში ჩავვარდი! ნუთუ ასე წავხდით, რომ ბოლნისელები ბოლნისელებს სახლში უვარდებიან და ძარცვავენ?!(ავადსახსენებელ 90 იან წლებშიც კი არ მახსოვს მსგავსი რამ) ვინ არიან ამის ჩამდენნი? ნუთუ მათთვის არავის უთქვამს, რომ ჩვენ ბოლნისელი ქართველები ოდითგან უმცირესობაში ვართ და თუ ბოლნისელი ხარ, ორგზის ქართველი მაინც უნდა იყო, თუ მეტის არა?! კარგი, თავი დავანებოთ ამ აღზრდამოკლებულ, უბედურ ცოდვის შვილებს, შუბლის ძარღვი რომ გაწყვეტიათ და ისეთიც არავინ გამოუჩნდათ, რომ შეაჯანჯღაროს და შემოულაწუნოს, უთხრას: გონზე მოდით რას ჩადიხართო. ცოტა ხნით თავი დავანებოთ და მეორე მხრიდან შევხედოთ ამ უბედურებას: კი მაგრამ, ჩალით დაიხურა ბოლნისის ცა?! პარლამენტში ორი ბოლნისელი გვყავს! გამგებელი ბოლნისელი გვყავს, თბილისის პროკურორი ბოლნისელია, კობა ჟღენტი გვყავს, მოზარდების ჭეშმარიტ ქართველებად აღზრდის მაესტრო და კიდევ რამდენი საამაყო ადამიანი გვყავს ბოლნისში და როგორ ვეგუებით ამ სიტუაციას?! პოლიცია? სადაა ჩვენი, ბოლნისის პოლიცია? რატომ არ რეაგირებს ამ საშინელებაზე? ღირსების საკითხი მგონია მე ეს. ამ ხელისგულისოდენა ბოლნისში, ჩემს, თქვენს სათაყვანებელ კოპწია, ქალაქში, ვიღაცეები მოსახლეობას რომ ატერორებენ, ამაზე რეაგირება ვის ეკუთნის, მეტყვის ვინმე? გვარი და სახელი არ ვიცი, რომ მოვნიშნო....დავადგენ და ჩავასწორებ პოსტსაც. ვერ მოვითმინე, თორემ ჯერ უნდა დამედგინა და მერე უნდა დამეწერა... მაპატიეთ, სიტყვა გამიგრძელდა! იქნებ, არც კი მქონდა მორალური უფლება ამ ყველაფრის თქმისა, მაგრამ მაინც ვთქვი.
P.S. ჰეი, თქვენ, ქურდბაცაცებო, გონზე მოდით, შეჩერდით, თქვენ ხომ ბოლნისელები ხართ!'-ასეთი ამაღელვებელი პოსტი დადო ქალბატონმა ხათუნამ თავის ფეისბუქ გვერდზე.

იმედია ჩვენი ხმა არ იქნება “ ხმა მღაღადებლისა უდაბნოსა შინა". როდემდე უნდა აიტანოს ხალხმა ეს უმსგავსობა. ნუთუ ქვეყანა მართლა ჩალითაა დახურული. რატომ დუმს მთავრობა ამაზე. იქნებ ამ სტატიის წაკითხვის შემდეგ ვინმემ გულთან მიიტანოს ბოლნისელების გასაჭირი და რეაგირება მოახდინოს ამ უმსგავსობაზე.