ბათუმის ვანდალურ მოვლენებზე მსჯავრდებულები ირაკლი ჩხვირკია და მერაბ ღოღობერიძე პატიმრობიდან გათავისუფლდნენ. გავრცელებული ცნობით, ბრალდებულების ვადაზე ადრე გათავისუფლების გადაწყვეტილება პირობით ვადაზე ადრე გათავისუფლების კომისიამ მიიღო.

შეგახსენებთ, ჩხვირკიას ბრალი სისხლის სამართლის კოდექსის 225-ე მუხლის პირველი ნაწილით ჰქონდა წარდგენილი, რაც გულისხმობს მასობრივი არეულობის ორგანიზებას ან ხელმძღვანელობას, რასაც თან ახლავს ძალადობა, რბევა, ცეცხლის წაკიდება, იარაღის ან ასაფეთქებელი მოწყობილობის გამოყენება ანდა ხელისუფლების წარმომადგენლისადმი შეიარაღებული წინააღმდეგობა.

ღოღობერიძეს და ჩხვირკიას ბათუმის 2017 წლის 11-12 მარტის აქციების ორგანიზების ბრალდებით ერთი წლითა და ექვსი თვით პატიმრობა შეეფარდათ.

ჩხვირკია სააკაშვილის გუნდში, ღოღობერიძე კი სააკაშვილთან დაპირისპირებულ უფლებადამცველადაა ცნობილი. შესაბამისად, მათი ერთობლივი კავშირი მომხდარის ორგანიზებასთან დაკავშირებით თავიდანვე ბუნდოვანი იყო.