"მეთაურის ალექსეი მაისტრენკოსა და მისი გარემოცვის არაკომპეტენტურობისა და მის მიერ გაცემული უკანონო ბრძანებების გამო, 20 დეკემბერს "ქართულმა ლეგიონმა" სრული შემადგენლობით დატოვა 54-ე ბრიგადა. 2017 წლის 16 დეკემბერს ჩატარებული ოპერაციის შესახებ, როდესაც ქართული ლეგიონისა და 25-ე ბატალიონის 11 მებრძოლი დაჭრეს, უახლოეს დღეებში პრესკონფერენციაზე ვისაუბრებთ", – აღნიშნულია "ფეისბუქში" "ქართული ლეგიონის" პრესსამსახურის სახელით გავრცელებულ განცხადებაში.

ამავე განცხადების თანახმად, ბრიგადის ხელმძღვანელობა სამხედრო ჰოსპიტალში მყოფ დაჭრილ ქართველ მებრძოლებს დეპორტაციით ემუქრება, თუკი ისინი 16 დეკემბრის ოპერაციის დეტალებს გაამჟღავნებენ.

"ქართული ლეგიონი" 2014 წელს ჩამოყალიბდა, რომლის წევრებიც წლების განმავლობაში უკრაინას დონბასში მიმდინარე საომარ მოქმედებებში დახმარებას უწევდნენ. 2016 წლის თებერვალში ლეგიონი 25-ე ბატალიონის 54-ე ბრიგადას შეუერთდა.