მამა პეტრემ 14 წლის ქალიშვილის რამდენიმე ფოტო სოციალურ ქსელში გაავრცელა, რასაც დიდი სკანდალი მოჰყვა. საზოგადოების ნაწილმა ჩათვალა, რომ ფოტოები ზედმეტად თამამი იყო. სკანდალმაც არ დააყოვნა და მამა-შვილი სრულიად ქართული მოსახლეობის განკითხვის საგნად იქცა. რამდენიმე დღის მანძილზე განიკითხავდნენ, ლანძღავდნენ, ამხნევებდნენ და გვერდშიც ედგნენ. სკანდალი ჩაცხრა, 14 წლის მარიამ კვარაცხელია კი საზოგადოების მეხსიერებაში დარჩა. გოგონას ინტერვიუს თუ წაიკითხავთ ადვილად მიხვდებით, რომ ლაღი, ჭკვიანი, ნაკითხი და მიზანდასახული ბავშვია, ისეთი მისი ასაკის ბავშვებში ერთი-ორს რომ შეხვდებით. მარიამმა "პროფილის" რეკლამაშიც მიიღო მონაწილეობა და გადაცემაშიც სულ მალე ვიხილავთ.
გურამ შეროზიამ მომხდარზე საკუთარი აზრი დააფიქსირა და მეტიც, მარიამი თავის პირველ მუსიკალურ კლიპში გადაიღო. "დღევანდელ საქართველოში, არც ისე მარტივია მარიამისთვის ცხოვრება, ვინმე ამიხსნის, რატომ უნდა გადმოვიდეს მამის ვალდებულებები შვილზე? ან ვალდებულებები ვინ გამიჯნა სოციალურ თუ მედია აქტივობებთან მიმართებაში?

ის, რომ მღვდლის შვილი ხარ, რატომ გავალდებულებს იმაში, რომ აუცილებლად კოჭებამდე კაბით იარო, ზღვაზე თუ აუზზე მაისურით იბანავო, არ გაიკეთო პირსინგი, არ იცხოვრო რიგითი მოზარდის და ზრდასრულის ცხოვრებით?"-წერს ბლოგერი.

"მარიამი ჩემს პირველ მუსიკალურ კლიპში გადავიღე და შევეცადე საზოგადოებისთვის მისი ნამდვილი სახე დამენახებინა და არა ისეთი, როგორიც მათ უნდათ, რომ წარმოიდგინონ. ჰო, ნამდვილი სახე: ლაღი, ბავშვური, მხიარული, სუფთა და ხშირად ზრდასრულ ადამიანზე მეტად ღრმა, ემოციური და სერიოზული".