ამ ცოტაოდენი ხნის წინათ Youtube-ზე დაიდო ვიდეო, სადაც ნაჩვენებია უნიკალური კადრები, თუ როგორ გადაურჩა ნორვეგიელი პარაშუტისტი ანდრეს ჰელსტრუპი მეტეოროტის დაცემას.

ჰელსტრუპი თავის გადმოხტომას იღებდა კამერით, რომელიც მის შლემზე იყო დამაგრებული. ჩანაწერში კარგად ჩანს, თუ უეცრად როგორ ჩნდება ცაში რაღაც მახვილკუთხა ობიექტი.

მან პარაშუტისტს სულ რამოდენიმე მეტრში ჩაუარა. მისი ჩავლიდან რამოდენიმე წამის შემდეგ ანდრესს პარაშუტი უკვე გახსნილი ჰქონდა.

"მე მქონდა შეგრძნება, რომ რაღაც არაჩვეულებრივი და უცნაური ხდება ჩემს ახლოს, მაგრამ კერძოდ რა, ამის ახსნა არ შემეძლო"-უთხრა მოგვიანებით ანდრესმა ჟურნალისტებს.

იმისათვის, რომ გაეგო, თუ რა საგანმა ჩაუქროლა ჰაერში, ჰელსტრუპმა ჩანაწერი ოსლოს საბუნებისმეტყველო მეცნიერებათა მუზეუმის თანამშრომლებს გაუგზავნა. გეოლოგებმა როგორც კი ნახეს ვიდეოჩანაწერი, ბევრი თავის მტვრევა სულაც არ დასჭირვებიათ მიმხვდარიყვნენ, რომ ეს საგანი ჩვეულებრივი მეტეორიტი იყო.

მონაცემების მიხედვით, ჰელსტრუპის შემთხვევა პირველია ისტორიაში, როცა პარაშუტისტი მოწმე გახდა დედამიწის ატმოსფეროში ჩამქვრალი და თავისუფლად ვარდნადი მეტეორიტის ხილვისა.

" ალბათობის მიხედვით, ეს უფრო მეტი იშვიათობაა, ვიდრე ის, რომ ზედიზედ სამჯერ მოიგოთ ლატარიაში, "-ასე დაახასიათა ეს შემთხვევა მუზეუმის მთავარმა გეოლოგმა ამუნდსენმა. ვიდეოს Youtube-ზე გამოქვეყნება კი გადაწყდა იმისათვის, რომ შესაძლებელი ყოფილიყო ამ მეტეორიტის პოვნა. მეცნიერებმა ადგილობრივ მოსახლეობას თხოვეს დახმარება ამ საქმეში.

გთავაზობთ პარაშუტისტის მიერ გადაღებულ ვიდეოჩანაწერს, რომელზეც ნათლად ჩანს მეტეორიტის ვარდნა.